Disa të shtënat me armë zjarri në lagjen “Kodra e Priftit” në Tiranë alarmuan banorët e kësaj zone këtë të shtunë, të cilët telefonuan policinë se një person qëllonte me armë në ajër.
Në vendngjarje forcat e Komisariatit Nr.4 të Policisë në Tiranë kapën dhe arrestuan të dyshuarin, 48-vjeçarin Adnand Gaxheri, banues në të njëjtën lagje, i cili qëllonte në ajër me fishekë manovër.
Ndërsa në banesën e tij, policia gjeti dhe sekuestroi 4 pistoleta sportive të llojeve dhe markave të ndryshme që përshtaten edhe si armë zjarri, si dhe një shotgun me shënjestër optike, që mbaheshin pa leje.
Gjithashtu u sekuestruan në cilësinë e provës materiale edhe 6 gëzhoja që ky shtetas kishte qëlluar me fishekë manovër, duke terrorizuar banorët.
48-vjeçari Gaxheri akuzohet për “Prodhimi dhe mbajtja pa leje e armëve të gjuetisë dhe sportive” dhe “Prishja e qetësisë publike”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
