Humbja në Korçë me Skënderbeun nuk është pritur mirë nga presidenca e Kukësit dhe ka sjellë shkarkimin e trajnerit, Armando Cungu. Vetëm pak ditë pas kësaj disfate në shifrat 1-0, që duket se e ka nxjerrë klubin verilindor nga gara për titullin kampion, presidenti Safet Gjici nuk ka duruar më dhe e ka larguar teknikun shkodran. Lajmi për shkarkimin e Cungut është bërë zyrtar përmes një postimi në rrjetet sociale nga vetë klubi i Kukësit. Rezultatet e dobëta kanë sjellë në këtë pikë, shkruhet ndër të tjera në njoftimin e Kukësit si arsyetim për këtë vendimmarrje.
Njëkohësisht në njoftimin e tij, klubi kuksian ka njoftuar edhe emrin e trajnerit të ri të skuadrës. Në stol do të ulet Ramadan Ndreu, i cili më herët ka mbajtur rolin e menaxherit të klubit. Për trajnerin Ndreu, ky është një rikthim në pankinën e Kukësit, pasi edhe më herët ai e ka drejtuar këtë skuadër.
Kukësi aktualisht është në vendin e dytë në Superligë me 9 pikë më pak se Partizani, me të cilin do të ndeshet në raundin e ardhshëm, pas ndeshjeve të kombëtareve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
