.png)
Gazeta Si- Një tërmet me magnitudë 7.2 u regjistrua në Peru në orën 00:36 (06:36 në Shqipëri) me epiqendrën e tij jashtë rajonit të Arequipas.
Nuk raportohet për dëme apo viktima sipas mediave ndërkombëtare. Instituti Gjeofizik i Perusë (IGP), raportoi se tërmeti ndodhi në një thellësi prej 42 kilometrash dhe se epiqendra ishte në Oqeanin Paqësor, 54 kilometra nga qyteti bregdetar Yauca.
Për këtë arsye, drejtoria e hidrografisë dhe lundrimit të Marinës lëshoi një paralajmërim për cunami si masë parandaluese, i cili më pas u anulua.
Instituti gjeofizik amerikan USGS ndërkohë raporton në faqen e tij se pas tërmetit të parë të fortë, pasuan edhe dy të tjerë, me magnitudë 4.4 dhe 4.7 ballë. Një tërmet me magnitudë 5.7 ndodhi në Yauca të shtunën e kaluar.
Kryeministri Gustavo Adrianzen ka qetësuar popullatën: “Tërmeti ka kaluar, po bëjmë vlerësimet e para dhe deri më tani nuk ka të vdekur”.
Drejtori i IGP-së, Hernando Tavera foli për "lëvizje mjaft intensive të tokës që e shtyu popullsinë të braktiste shtëpitë e tyre".
Tërmeti u ndje në pjesën më të madhe të bregdetit jugor dhe qendror të Perusë dhe deri në kryeqytetin e vendit Lima, një distancë prej rreth 790 kilometrash.
Mbrojtja Civile dhe qeveria mobilizuan avionët e tyre të emergjencës për të vlerësuar dëmet.
Në qytetet bregdetare Lomas dhe Chalas, banorët u evakuuan përkohësisht në zona larg bregdetit për shkak të rrezikut nga cunami.
Media raporton gjithashtu se në hyrje të lagjes “Huanuhuanu”, një rënie guri ka ndodhur në urën San Andrés, duke ndërprerë trafikun.
E njëjta gjë ndodhi edhe në rrethin e Mariano Nicolas Valcarcel, ku rrëshqitjet e dheut bllokuan rrugët rreth zonës minerare të Secocha (Camanà).
Peruja, me 33 milionë banorët e saj, ndodhet në të ashtuquajturën Unaza e Zjarrit të Paqësorit, një zonë e gjerë me aktivitet intensiv sizmik që kalon përgjatë bregut perëndimor të Amerikës dhe goditet nga qindra tërmete çdo vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
