.png)
Nga Gazeta 'Si' - Kreu i Grupit Parlamentar të PS Niko Peleshi ka reaguar në lidhje me situatën e krijuar sot në Kryesinë e Kuvendit.
Pasi Garda ndaloi anëtarët e opozitës të futen në komisionin hetimor të Sterilizimit, Xhelal Mziu shtyu kolegen Milva Ekonomi dhe më pas një anëtar të Gardës.
Peleshi u shpreh se dhuna ndaj deputetes ishte e papranueshme, ndërsa shtoi se opozita po tenton të sjellë krizën e vet edhe në Kuvend. Kreu i grupit u bëri thirrje demokratëve të rikthehen në rrugën e dialogut.
"Pas përpjekjeve të dhunshme të Partisë Demokratike për të penguar punimet e seancës plenare dhe sulmet me molotov ndaj institucioneve, sot është tejkaluar çdo kufi me cenimin fizik të deputetes së mazhorancës, Milva Ekonomi, nga deputetët e përjashtuar të opozitës, Xhelal Mziu dhe Ina Zhupa. Opozita po tenton të sjellë krizën e vet edhe në Kuvend. Dhuna ndaj deputetëve, stafit të Kuvendit, Gardës apo Policisë është absolutisht e papranueshme dhe e dënueshme.
I bëjmë thirrje deputetëve të Partisë Demokratike të rikthehen në rrugën e arsyes dhe të dialogut. Dhuna dhe përpjekjet për të bllokuar punën e Kuvendit nuk i shërbejnë as qytetarëve, as demokracisë", shkroi ai në Facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
