Autoriteti i Mediave Audiovizive bën të ditur se televizionet lokale dhe rajonale kanë përfituar deri tani rreth 280 mijë euro kompensim për lirimin e frekuencave të tyre analoge, në kuadër të procesit të digjitalizimit.
Nga 1 milionë euro që është fondi i parashikuar për këta operatorë në ligjin “Për lirimin e frekuencave të Digjital Dividendit”, vetëm më pak se 30% e tij është shpërndarë.
Pjesa më e madhe e fondit ka shkuar për kompensimin e frekuencave të liruara në allotmentet e Tiranës dhe Fierit si një formë mbështetjeje për këto televizione, në mënyrë që ato të përballonin tarifën e mbështetjes në rrjetin numerik të Radio Televizionit Shqiptar.
Në fillim të këtij viti, Këshilli i Ministrave miratoi Planin e Ri Kombëtar të Frekuencave, që sanksionon përfundimisht lirimin e frekuencave të tjera nga operatorët televizivë, me qëllim ofrimin e tyre për qëllime të komunikimeve elektronike.
Sipas Planit të ri, brezi 694-790 MHz, do të kalojë përfundimisht nën administrimin e Autoritetit të Komunikimeve Elektronike dhe Postare (AKEP) duke filluar nga 30 qershori 2022.
Pasi frekuencat të kalojnë nën administrimin e AKEP, ato do të mund të tenderohen për ofrimin e shërbimeve 5G nga operatorët celularë. Kjo pritet të sjellë një kompensim të mëtejshëm për operatorët e platformave numerike që i shfrytëzojnë aktualisht këto frekuenca.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
