Aventura e Leroy Sané te Bayern Munchen nuk po shkon siç pritej. Bavarezët shpenzuan 49 milion euro për të në verë. E kërkuan me ngulm që në 2019, por negociatat me City u ndërprenë pas dëmtimit që e detyroi gjermanin të qëndronte jashtë fushës për pothuajse tërë sezonin e kaluar. Megjithatë, pavarësisht nga interesimi i gjatë, tani romanca nuk po funksionon. Dje Sané, në përplasjen e drejtpërdrejtë me Leverkusen, hyri në 32 ‘në vend të Coman (problem muskulor, priten rezultatet e kontrolleve), por u hoq nga fusha përsëri në 68’ për t’i lënë vend 17-vjeçarit Musiala. Vetëm 36 minuta lojë. “Zëvendësimi më befasoi – i tha Sané Bild në fund të ndeshjes -. Nuk jam mësuar me zgjedhje të tilla. E gjithë ekipi, megjithatë, ishte pranë meje dhe festuam fitoren së bashku.” Megjithatë, Sané për momentin duhet të gëlltisë disa kritika.
Opinioni publik ka mbështetur teknikun Flick, megjithëse zëvendësimi i një lojtari në më pak se 40 minuta lojë nuk është një shenjë e mirë. “Ai nuk është një lojtar që përforcon Bayern – shpjegoi Lothar Matthäus -. Ai bën shumë gabime në fazën mbrojtëse, shpesh ndalet për të parë në vend që të bashkëpunojë. Ai nuk pritet të shënojë tre gola në ndeshje, por të luajë me pasion. Dhe këtë nuk e shoh”. Në 36 minutat në fushë, Sané në fakt bëri keq gjatë gjithë kohës: zero goditje në portë, zero krosime, 27% e pasimeve të gabuara. Numrat që në të vërtetë tregojnë një qasje të papërshtatshme. Jo vetëm kaq: gjatë sezonit Sané i kishte shanset e tij (16 paraqitje nga 22, por 5 ndeshjet i ka humbur për shkak të lëndimit), por pas një fillimi të mirë, ai u shua, aq sa në nëntor ka shënuar vetëm një gol në 7 ndeshje të Bundesligës.
Pas ndeshjes, zëvendësimi i Sané ka qenë pika që tërhoqi vëmendjen, duke e bërë teknikun Flick të tentojë shpjegimin. “Doja në fushë Musiala e në atë pikë mund të hiqja vetëm Müller, Gnabry ose Sané – shpjegoi trajneri -. Për ne Thomas është i pazëvendësueshëm. Serge ishte rritur shumë në pjesën e dytë, kështu që e vetmja mundësi ishte Leroy. E rëndësishme është që ekipi të jetë i suksesshëm. Individi duhet të zërë vendin e dytë. Ai duhet ta pranojë ” ka qenë komenti i ftohtë i një trajneri i cili, në emër të suksesit, nuk është i gatshëm të bëjë pakt me askënd.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
