.png)
M.S. është një zotëri që zakonisht punon në ndërtim. Por ka mbi 10 vjet që del në rrugë për të shitur lule në 3 ditë të zgjedhura të vitit, Shën Valentin, 7 dhe 8 mars, në një cep trotuari në zonën e ish-Bllokut.
“E nisa për t’i bërë qefin gruas, të them të drejtën. Asaj i pëlqente të punonte me lulet dhe dolëm t’i shisnim. Tani u bëmë 10 vite në të njëjtin vend”, thotë ai për Gazetën “Si”.
Bashkëshortja e M.S qëndron një kryqëzim më lart bashkëshortit, përsëri duke shitur lule, në 3 ditë të vitit.
Një buqetë e organizuar bukur dhe thjesht mund ta marrësh për 500 lekë te M.S dhe bashkëshortja e tij. Ndonjë buqetë tjetër shumë më të madhe mund ta blesh për 1000 lekë.
“Lulet m'i sjell nipi nga Holanda qysh prej shumë vitesh. Kam 2 ditë që i punoj këto këtu. S'e vras mendjen për lodhjen, por më shumë se mos m'i prish shiu këtu në rrugë”, shqetësohet shitësi.
Fitimet e tyre së bashku për 2 ditë shkojnë rreth 10-20 mijë lekë. Pak vite më parë shitjet ditore të luleve nga M.S mund të arrinin shifrën e 60 mijë lekëve sepse dyqanet fizike ishin më të pakta dhe njerëzit kishin dëshira më të thjeshta. Tani "tregu informal i luleve" është penalizuar nga klientët që kanë formuar shije të tjera për buqetat me lule, organizime të personalizuara dhe forma nga më të ndryshmet si edhe nga dyqanet që i ofrojnë këto. Sipas M.S. një shitës në rrugë nuk ka mundësinë t’i përmbushë këto "teka".
Shitësi i luleve thotë se dyqanet e mirëfillta e ndjejnë konkurrencën e atyre pak ambulantëve që dalin për ditë festash. “Më ka ndodhur të më vijnë pronarët e dyqaneve e të mundohen të më largojnë me justifikimin se i kisha prishur punë dhe i kisha dal përpara dyqanit. Ndërkohë, dyqani i tyre ishte shumë larg. Prandaj zgjedh këtë cepin e rrugës këtu nuk shqetësoj as bizneset e as individët”, thotë M.S. Disa kohë më parë shitësi shqetësohej dhe u trembej autoriteteve bashkiake që mund të mos e lejonin shitjen e tyre, por më vonë pikërisht këto 3 ditë, Bashkia e Tiranës i lejoi shitësit e luleve.
"Dita më me shumë shitje gjatë gjithë kohës është 8 Marsi, kur burrat janë klientët në masën më të madhe", tregon shitësi duke qeshur.
Gjatë kohës së komunikimit tonë me shitësi e luleve, shumë klientë u afruan për të blerë buqeta dhe sapo merrnin vesh çmimet modeste të tij, rrisnin kërkesën tyre. Mes tyre ishte edhe një zotëri, një ish-akademik që bleu një karafil teksa në dorë mbante një trëndafil. “Një e kam për gruan, një e kam për komshijen, është e ve, pa djalë, e kujtojmë gjithmonë, ndër vite”, tregon blerësi.
Si ai, ndalojnë gjithnjë e më shpesh edhe të tjerë. Aty pranë urës së Bllokut lulet janë me çmim të ulët... Të paktën në 3 ditë të vitit...
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
