Të premten, më 13 maj, në Bruksel do të mbahet takimi i radhës ndërmjet Kosovës dhe Serbisë në nivel të kryenegociatorëve.
Ky takim pritet të shërbejë si përgatitje për takimin e ardhshëm në nivel të lartë për dialogun Prishtinë-Beograd.
Kështu ka deklaruar në një përgjigje me shkrim zëdhënësi i Bashkimit Europian, Peter Stano.
Stano ka thënë se takimi i së premtes, mes kryenegociatorit të Kosovës Besnik Bislimit dhe atij të Serbisë, Petar Petkoviç, ka për synim të vazhdojë diskutimet për gjetjen e rrugës përpara për një numër çështjesh.
“Dialogu i ndërmjetësuar nga BE do të vazhdojë të premten më 13 maj me një takim në nivelin e kryenegociatorëve në Bruksel. Qëllimi është të vazhdojnë diskutimet për gjetjen e një rruge përpara për një sërë çështjesh dhe të përgatitet takimi i ardhshëm i nivelit të lartë të Dialogut”, ka deklaruar Stano.
Ai ka theksuar se çështja e targave, energjisë dhe personat e pagjetur do të jenë sërish në axhendë.
“Të gjitha temat e diskutuara në takimin e fundit të kryenegociatorëve në prill do të jenë sërish në axhendë, veçanërisht targat, energjia dhe personat e zhdukur”, u shpreh Stano.
Takimi i fundit në kuadër të dialogut Kosovë-Serbi, në mes liderëve, kryeministrit të Kosovës, Albin Kurti, e presidentit të Serbisë, Aleksandar Vuçiç, qe zhvilluar në korrik të vitit të shkuar. Javën e shkuar në Berlin ata patën një darkë jozyrtare, me ftesë të kancelarit gjerman Olaf Scholz.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
