.png)
Gazeta Si – Apeli i GJKKO-së, ka kthyer për rigjykim dosjen ndaj të pandehurve Erjon Kasmi dhe Xhulian Xhafa, të shpallur fajtorë për një skemë mashtrimi me “Call Center” dhe vjedhjen e 7 milionë eurove.
Sipas vendimi të Apelit, çështja do të kthehet për rigjykim në Shkallën e Parë me një trupë tjetër gjykuese.
Kasmi dhe Xhafa ishin vetëm 2 prej 13 të pandehurve që u shpallën fajtor nga Gjykata e Posaçme e Shkallës së Parë në korrik të vitit të kaluar.
Sipas hetimeve ata përllogaritet të kenë përfituar nga kjo skemë vlerën e 7 milionë eurove.
Gjykata e Posaçme e ka shpalli Erjon Kasmin fajtor për kryerjen e veprave penale “Mashtrimi kompjuterik”, e kryer në bashkëpunim dhe “Grupi i strukturuar kriminal” duke e dënuar me 11 vite burg në total, nga të cilat do të kryente 7 vite e 4 muaj, për shkak se i ulej 1/3 e dënimit. Xhafa ishte dënuar me 10 vite burg në total, por do të vuante vetëm 6 vite e 8 muaj burgim, për të njëjtën arsye.
Në Shkallën e Parë, SPAK nuk arriti të provonte se 24 pasuri, ku përfshihen llogari bankare, apartamente dhe truall toke, janë produkte të veprës penale.
Për këtë arsye 20 pasuri të Erjon Kasmit dhe 4 të Xhuliano Xhafës të sekuestruara me vendim të Prokurorisë në qershor dhe korrik të 2022, e më 5 maj të 2023, iu kthyen atyre pavarësisht dënimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
