.png)
Gazeta Si – Tensionet politike në Tajvan nuk janë zbutur, pasi Komanda Lindore e Ushtrisë Çlirimtare Popullore Kineze nisi patrullat e reja të përbashkëta ajrore dhe detare dhe stërvitjet ushtarake të forcave detare dhe ajrore rreth ishullit.
Një manovër ushtarake që ka shkaktuar zemërimin e Tajvanit, të cilin e ka dënuar ashpër. Stërvitja erdhi në lidhje me ndalesën e zëvendëspresidentit tajvanez William Lai në Shtetet e Bashkuara.
Ministria e mbrojtjes e Taipeit, thuhet në document, “dënon fuqishëm këtë sjellje irracionale dhe provokuese dhe do të dërgojë forcat e duhura për t’iu përgjigjur asaj në mënyrë që të mbrojë lirinë, demokracinë dhe sovranitetin e Tajvanit”.
Dhe çështja e Kinës ishte gjithashtu në qendër të samitit, i përcaktuar si “historik” nga Joe Biden, i cili u zhvillua në Camp David.
Shtetet e Bashkuara, Japonia dhe Koreja e Jugut kanë krijuar një aleancë sigurie pikërisht për të përballuar hegjemoninë kineze dhe rrezikun nga Koreja e Veriut.
‘Inkursioni i 42 avionëve dhe 8 luftanijeve’ – Qeveria e Tajvanit thotë se ka zbuluar 42 inkursione nga avionë luftarakë kinezë në zonën e saj të mbrojtjes ajrore, që kur Pekini njoftoi nisjen e stërvitjeve ushtarake.
“Ne kemi zbuluar më pas 42 fluturime”, tha në një deklaratë ministria e Mbrojtjes e ishullit, duke shtuar se 8 anije kineze bashkëpunuan në manovra.
Midis këtyre inkursioneve, 26 avionë luftarakë kaluan vijën mesatare të ngushticës së Tajvanit, tha ministria.
Ministria tajvaneze tha se “ushtria kombëtare po monitoron dhe përdor metoda zbulimi për të kontrolluar rreptësisht” situatën, duke shtuar se kishte dërguar avionë dhe anije.
Manovrat ushtarake të Pekinit – Nga Pekini, ka mbërritur një “shpjegim”, sipas të cilit patrullimet dhe stërvitjet shërbejnë si një paralajmërim i ashpër për marrëveshjet e fshehta të separatistëve të “pavarësisë së Tajvanit” me elementë të huaj dhe provokimet e tyre, tha zëdhënësi i komandës, Shi Yi.
Manovrat synojnë të trajnojnë koordinimin e anijeve dhe avionëve ushtarakë dhe aftësinë e tyre për të marrë kontrollin e hapësirave ajrore dhe detare, shpjegoi Shi, duke theksuar se aftësia e forcave të armatosura për të operuar në kushte reale luftarake do të testohet.
“Kryerja e një stërvitje ushtarake nën pretekst të rremë, jo vetëm që nuk kontribuon në paqen dhe stabilitetin në ngushticën e Tajvanit, por gjithashtu thekson mentalitetin militarist të Kinës dhe konfirmon natyrën hegjemoniste të zgjerimit ushtarak”, të Pekinit, thuhet në një deklaratë nga ana e Taipeit.
“Ndalesa” në SHBA që irritoi Pekinin – William Lai u ndal në Nju Jork dhe San Francisko pas një vizite në Paraguaj, një nga vendet e pakta që njeh zyrtarisht Tajvanin.
Ky udhëtim ka ngjallur zemërimin e Kinës, e cila kundërshton çdo kontakt zyrtar midis vendeve perëndimore me ishullin Tajvanez, të cilin e konsideron si provincë të saj.
Pekini beson se kontakte të tilla legjitimojnë autoritetet e Taipeit dhe minojnë pretendimet e tij për sovranitet mbi Tajvanin.
Uashingtoni kishte bërë thirrje për qetësi në udhëtimin e Lait, i cili sipas autoriteteve tajvaneze ishte vetëm një “tranzit” në tokën amerikane për të shkuar në Paraguaj dhe për të marrë pjesë në inaugurimin e presidentit të zgjedhur Santiago Peña.
Por një zyrtar në zyrën e Partisë Komuniste të Kinës, i ngarkuar me çështjet e Tajvanit, “dënoi fuqishëm” udhëtimin e Lait si “një provokim tjetër” për të “forcuar marrëveshjen e fshehtë me Shtetet e Bashkuara”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
