.png)
Gazeta Si – Sipas Ministrisë së Mbrojtjes, mbi 400 mijë qytetarë tajlandezë janë evakuuar nga zonat pranë kufirit me Kamboxhian. Kjo vjen pas përleshjeve të vazhdueshme përgjatë kufirit ditët e fundit mes dy vendeve.
Zëdhënësi i ministrisë, Surasant Kongsiri, përshkroi shkallën e operacionit në një konferencë për shtyp, duke shpjeguar se “mbi 400,000 njerëz janë zhvendosur në strehimore”.
Masa, shtoi ai, u urdhërua, sepse “civilët u evakuuan masivisht për shkak të asaj që ne e vlerësuam si një kërcënim të menjëhershëm për sigurinë e tyre”.
Autoritetet tajlandeze akuzojnë Kamboxhian për pozicionimin e armëve në një zonë të diskutueshme të provincës bregdetare të Tratit, duke besuar se këto aktivitete janë shkaku i luftimeve të ripërtërira.
Sipas Bangkokut, vendosja kontribuoi në rindezjen e armiqësive në zonën kufitare.
Hun Sen, ish-kryeministër i Kamboxhias dhe president aktual i Senatit, deklaroi se Phnom Penh u përgjigj ushtarakisht, pasi “duroi për më shumë se 24 orë për të respektuar armëpushimin dhe për të lejuar evakuimin e civilëve”.
Vetë Hun Sen shtoi se Kamboxhia po “lufton për të mbrojtur veten” dhe akuzoi Tajlandën për shkelje të marrëveshjeve të arritura në muajt e mëparshëm.
Përballja është pjesë e një mosmarrëveshjeje të rrënjosur në kufijtë e vendosur gjatë epokës koloniale franceze, me të dy vendet që pretendojnë disa tempuj dhe vende historike përgjatë vijës ndarëse territoriale.
Kryeministri tajlandez, Anutin Charnvirakul deklaroi se ushtria kombëtare do të “mbrojë sovranitetin kombëtar” dhe përjashtoi çdo tërheqje të menjëhershme nga zonat e prekura.
“Kam zgjidhur tetë luftëra, përfshirë atë midis Tajlandës dhe Kamboxhias, të cilën e rifilluan sot. Do t’i telefonoj nesër. Kush mund të bëjë një telefonatë dhe të zgjidhë një luftë?”, – tha presidenti amerikan, Donald Trump.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
