Gazeta Si – Kosova është mundur sërish nga Greqia në Ligën e Kombeve. Këtë herë në Vollos, me rezultatin 2-0. Por ndeshja ka kaluar në plan të dytë, sepse tifozët kosovarë janë sulmuar nga ata vendës. Kjo ngjarje ka marrë gjithë vëmendjen.
Në stadiumin “Panthessaliko” janë shfaqur disa skena shumë të shëmtuara. Atmosfera nuk ishte aspak miqësore në stadium.
Fillimisht, grekët vërshëllyen himnin e Kosovës dhe provokuan me një flamur serb. Më pas tifozët vendës vazhduan me provokimet ndaj lojtarëve të Kosovës, pastaj sulmuan edhe tifozët kosovarë.
Pjesa e dytë ka qenë më e tensionuar dhe ka pasur një përplasje mes dy tifozerive. Drejt sektorit të tifozëve kosovarë janë hedhur sende, shishe dhe fishekzjarre.
Ishte minuta e 72-të e ndeshjes dhe në këtë moment ka pasur një ndërprerje. Pas golit të avantazhit, tifozët grekë ishin të papërmbajtshëm. Lojtarët e Kosovës, me në krye Muriqin dhe Rrahmanin, janë ankuar tek arbitri austriak, duke i thënë se është vetëm një ndeshje futbollit dhe jo luftë.
Pas ndërhyrjes së policisë, ndeshja ka vazhduar dhe Greqia në shtesë ka shënuar edhe golin e dytë. Por kjo ndeshje me siguri do të jetë objekt për Komisionin e Disiplinë së UEFA-s. Greqia rrezikon shumë dënimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
