Tomas Strakosha është treguar i duruar, një profesionist i vërtetë. Portieri kuqezi ka punuar me qetësi dhe ka pritur momentin e tij te Lacio. Dhe momenti ka ardhur, Sarri është dorëzuar dhe ia ka besuar atij çelësat e portës në ndeshjen me Sampdorian, ku Lacio fitoi 1-3.
U duk një Strakoshë si ai i kohëve të arta, i rilindur. Ajo gafë ndaj Gallatasarajit në Ligën e Europës duket një kujtim i largët tashmë për portierin kuqezi. Strakosha është vlerësuar me notën 6.5 për paraqitjen ndaj Sampdorias, ku bëri 2-3 pritje vendimtare.
Sipas shtypit italian, është luks të kesh në skuadër një portier të dytë si Strakosha, por më shumë mundësi, tashmë ai e ka fituar vendin e titullarit. Titullar me Lacion ishte edhe mbrojtësi Elseid Hysaj, këtë herë i kthyer në të djathtë të mbrojtjes nga trajneri Sarri. Futbollisti shkodran ka bërë paraqitjen e tij të zakonshme dhe është vlerësuar me notën 6.
Në Spanjë, fundjavën që lamë pas janë ndeshur mes tyre Ivan Balliu dhe Keidi Bare, dy futbollistët e Kombëtares. Të dy ishin titullarë në ndeshjen Rajo-Valekano-Espanjol, por Balliu luajti deri në fund, ndërsa Bare u zëvendësua pas 60 minutash. Fati i ka buzëqeshur mbrojtësit të djathtë, pasi Rajo Valekano ka fituar 1-0, falë një autogoli. Valekano mban vendin e 6-të në La Liga, kurse Espanjoli të 11-tin.
Me fat ishte java e fundit për sulmuesit kuqezinj. Armando Broja dhe Rei Manaj shënuan për skuadrën e tyre në Angli dhe Itali. Southemptoni i Brojës barazoi 1-1 ndaj Brajtonit, kurse Specia e Manajt barazoi 2-2 me Sasuolon.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
