Spanjë, ndërprerje në funksionimin e telefonisë fiske dhe internetit

11:18 - 20 Maj 2025

Gazeta Si – Pas ndërprerjes masive të energjisë elektrik të 29 prillit, sot në Spanjë telefonat dhe interneti nuk funksionuan.

Që nga orët e para të mëngjesit të kësaj të marte, rrjeti kombëtar i telekomunikacionit ka pasur probleme në disa zona të vendit, duke përfshirë Andaluzinë (veçanërisht qytetet Sevilja, Kadiz dhe Huelva), Galicia, Vendi Bask, Aragoni, Navarra, Extremadura dhe Komuniteti Valencian.

Telefonat fiks kanë “heshtur” dhe rrjeti fiks i internetit mbeti i bllokuar. Shqetësimi më i madh për momentin është se numri i emergjencës 112 nuk funksionon në disa zona të vendit.

Komunitetet autonome të prekura kanë aktivizuar numra telefonikë alternativ, por në nivel lokal ankohen për mungesën e informacionit të qartë.

Në zonat baske të Spanjës, autoritetet thanë se incidenti ishte jashtë kontrollit të Qendrës së Menaxhimit të Emergjencave të Qeverisë së Komunitetit, duke vënë në dukje se stafi ishte në kontakt të vazhdueshëm me kompaninë telefonike për të zgjidhur incidentin sa më shpejt të ishte e mundur.

Ndryshe nga errësira totale e muajit të kaluar, e cila la në errësirë të gjithë vendin, këtë herë autoritetet identifikuan menjëherë shkakun si punë mirëmbajtjeje të kryer nga kompania “Telefònica”.

“Ne kemi bërë disa përditësime të rrjetit që kanë prekur shërbime specifike të disa kompanive. Ne po punojmë për të zgjidhur këtë çështje”, tha një zëdhënës.

Faqja e internetit “Downdetector” raporton se problemet e shërbimit filluan pak pas orës 02:00 të mëngjesit të kësaj të marte dhe kanë prekur veçanërisht shërbimin fiks të internetit, me 72% të ndërprerjeve të raportuara ndërsa 18% e raportimeve kishin të bënin me mungesë sinjali dhe 10% për një “fikje totale”.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.