.png)
Gazeta Si - SPAK ka nisur hetimin pasuror për të arrestuarit e operacionit “Metamorfoza”. Mes personave ndaj të cilëve po bëhet hetim pasuror janë biznesmeni Pëllumb Gjoka, ish-drejtuesi i Forcës Operacionale Oltion Bistri dhe ish-kryeprokurori i Kukësit Xhevahir Lita.
Në ‘sitë’ janë vënë prona të luajtshme dhe të paluajtshme, automjete, banesa, biznese, llogari bankare etj. Qëllimi i hetimeve ka të bëjë me zbulimin e të ardhurave për të siguruar këto të mira materiale dhe nëse kanë burime të ligjshme. Ky hetim po ndiqet nga dy prokurorët Altin Dumani dhe Arben Kraja.
Një ditë më parë, Gjykata e Posaçme të Apelit zhvilloi një seancë me dyer të mbyllura ku është diskutuar lidhur me masat e sigurisë të të arrestuarve, nëse hetimi i tyre duhet të vijojë teksa ata ndodhen në qeli.
Të martën personat e mësipërm kërkuan daljen nga qelia, me pretendimin se transkriptet e ardhura nga Franca janë të pavlefshme, ndërsa të enjten në orën 10 vendoset nga gjyqtarja e Apelit Saida Dollani për kërkesën e tyre.
Ata akuzohen për 12 vepra penale ku më kryesoret janë për grup të strukturuar kriminal, vrasje, korrupsion etj.
Dosja lidhet me vrasjen e Gjin Boriçit në Shkodër, plagosjen e Taulant Pepajt, po në këtë qytet si dhe 3 plane atentatesh të parealizuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
