Pedagogia e Fakultetit të Drejtësisë, vajza e ish-kryeministrit Sali Berisha dhe bashkëshortja e Jamarbër Malltezit, Argita Malltezi ka analizuar dosjen e SPAK në ngarkim të bashkëshortit dhe të atit për çështjen “Partizani”.
Për “Top Story”, zonja Malltezi tha se pas 3 vitesh hetime shteruese, SPAK dhe GJKKO nuk kanë arritur të ngrenë aktakuzë, por kanë vendosur masë për kufizimin e lirisë personale të bashkëshortit të saj dhe ish-kryeministrit Berisha.
E bindur, Malltezi tha se nuk ka dhe as nuk kanë për të gjetur prova për çështjen.
Malltezi: SPAK ka bërë 3 vite hetime dhe në dosjen e GJKKO-së shënohet pas 3 vitesh hetime shteruese. Por pas 3 vitesh hetime shteruese nuk ka ngritur aktakuzë, por kanë marrë masë për kufizimin e lirisë personale dhe kanë filluar hetimin ndaj personit sepse hetimi fillimisht nuk ka qenë ndaj personit por ndaj çështjes, që është pa afat dhe mund ta zgjasnin sa të donin. Po të kishin gjetur një provë në këtë do të kishin ngritur aktakuzë, por këtu nuk ka akuzë sepse nuk ka prova.
Hoxha: SPAK procedon me masa sigurie njëherë dhe pastaj ngre akuzën në mënyrë të menjëhershme dhe dorëzon çështjen.
Malltezi: Ngre akuzën kur ka prova, por këtu nuk ka prova dhe nuk do të ketë akuzë. Gjithsesi nuk ka ngritur akuzë dhe në këtë formë ata mund të procedojnë kur ka raste flagrante, jo kur ka raste hetimesh që nuk nxjerrin prova.
I marrim me radhë, origjina e provës. E nisim me fletërrufenë e Taulant Ballës, dhe sot në vendimin e GJKKO-së citohet ajo me qëllim që të krijohet ai konfuzioni tek njerëzit se qenka problemi i pronës.
Por absolutisht nuk diskutohet më problemi i pronës. Në asnjë rresht nuk diskutohet më se prona u takon pronarëve, do ta merrni vendimin. Përmenden këto dokumentat e viteve ’43, ’46, të familjeve të ndryshme sepse unë po përmend ato të familjes Begeja. Origjina është diçka e shteruar. Të marrim kthimin. Gënjen SPAK sepse nuk ka prova kur thotë se kam bërë kërkesa në 2006-2007-ën dhe përdoret për sulme politike.
Prona e familjes Begeja ka dashur 15 vite që të kthehet. Ka filluar në ’94 nga motra e gjyshes, ka marrë vendimin e parë në ’96-ën, kanë marrë vendime të tjera në vitet në vijim. Edhe vendimi që është marrë në 2006-ën për kthimin e tokës që ishte njohur në ’96-ën është marrë nga Komisioni i Kthimit të Pronave me anëtarë nga Partia Socialiste. Pra, kjo është një pronë kthimi i së cilës ka zgjatur, në gjithë këto vite nuk ka pasur asnjë ndikim. Në këto vite im atë ka qenë President, Kryeministër dhe ajo dosje nuk ka asnjë fjalë të thotë që Sali Berisha ka ndikuar në mënyrë të paligjshme. As nuk ka që i ka kërkuar, e njëjta gjë edhe për Jamarbërin.”
Malltezi shtoi se familjet nuk janë shpronësuar dhe se SPAK është artopolant i gënjeshtrave të Ramës.
Ajo disa herë atakoi Prokurorinë e Posaçme dhe deklaroi për “Top Story” se as bashkëshorti dhe as i ati, nuk janë pyetur gjatë 3 viteve hetime për çështjen “Partizani”.
Sipas Malltezit, fakti që nuk kanë dëgjuar mbrojtjen apo personat kryesorë ndaj të cilëve rëndon çështja, tregon se ky është një sulm politik i hartuar nga Edi Rama, dhe SPAK dhe GJKKO janë kamxhik në duart e kryeministrit.
Sipas saj, SPAK nuk është drejtësi por deformim i pushtetit kriminal të kryeministrit Edi Rama.
E bindur, Malltezi tha se nuk ka dhe as nuk kanë për të gjetur prova për çështjen dhe tregoi se ka qenë ministri Anastas Angjeli ai që i dërgoi kërkesë zyrtare për fillimin e procedurave të privatizimit të klubit Partizani ministrit të Mbrojtjes, Pandeli Majko dhe ministrit të Sporteve, Blendi Klosi.
Bashkëshortja e Malltezit deklaroi se dega e familjes Begeja ka pasur përfaqësues të ndryshëm, me prokurë.
Sipas saj Jamarbër Malltezi nuk ka pasur prokurë me të gjithë pronarët e klubit “Partizani”.
“Vetëm dega e familjes Begeja që i përkiste të afërmve të Abit, kishte disa prokura. Çdo familje tjetër pronare ka pasur përfaqësuesit e tyre me prokurë dhe të gjitha këto janë në dosje. Abi nuk ka pasur prokurë me gjithë pronarët e klubit Partizani, ka pasur me njerëzit e fisit të tij. Është gjëja më normale.
Këtë prokurë e ka pasur pjesore në një moment të caktuar. I besuan një pjesë e degës së njerëzve të tij, dega tjetër nuk ia dha. Më vonë mori më shumë nga familja vet. Gjithmonë ka patur prokurë të fisit të vet”, tha Argita Malltezi.
Malltezi tha se nuk ishte ajo që e bëri Lulzim Bashën pjesë të PD, nisur nga pyetja e drejtuar nga gazetarja Anila Hoxha.
Malltezi: Për sa kohë ai nuk do të pranojë të bëjë kompromis me të keqen, është e drejta e tij të ndjekë atë që mendon se është e drejtë. Një ditë të gjithë ne dalim dhe bëjmë logaritë para tjetërkujt, atë ditë duhet të jesh i bindur se do të kesh diçka për të thënë.
Hoxha: Lulzim Basha ka qenë miku juaj, a jeni penduar që e keni sjellë në politikë?
Malltezi: Unë nuk e kam sjellë kurrë në politikë, është gënjeshtër, sigurisht që ka qenë pjesë e rrethit tim shoqëror, ka qenë pjesë e rrethit të afërt shoqëror, ai ka pasur ofertë nga një parti tjetër në 2005 kur ka ardhur, e vetmja gjë që më ka kërkuar ka qenë të takonte Sali Berishën. Nuk e kam ditur se për çfarë do të flasin dhe nuk kam dashur ta di. Nuk më ka kërkuar kurrë një gjë të tillë, s’e kam bërë jo me Lulzim Bashën, por me asnjë njeri tjetër për një arsye të vetme, sepse nuk kam dashur kurrë t’i jap kosto Sali Berishës.
Ajo u pyet gjithashtu nëse ka në plan të futet vetë në politikë.
“Jo. Betejën politike e bën Sali Berisha dhe them se shkëlqen në atë që bën. Unë nuk kam ndonjë plan të fshehtë për t’u futur në politikë. Unë kam zgjedhur me vetëdije këtë rrugë. Unë nuk kam asnjë plan për të hyrë në politikë. Jam pjesë e PD-së dhe vlerave që ajo përfaqëson”, tha Malltezi. (TCH)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
