.png)
Gazeta Si – Kledian Llaho është shkarkuar nga detyra e kreut të Prokurorisë së Sarandës dhe për 3 muajt në vazhdim paga e tij do të ulet me 20% të shumës së zakonshme mujore.
Vendimi është marrë nga Këshilli i Lartë i Prokurorisë, pasi SPAK e kishte pezulluar Llahon nga detyra nën dyshimin se kishte kryer shkelje të rënda gjatë një procesi hetimor duke favorizuar vjehrrin e tij.
Më herët, Inspektoriati i Lartë i Drejtësisë kishte konstatuar shkelje pas verifikimeve që pasuan ankesat e bëra nga qytetarët. Gjithashtu, në ankesat për Llahon kishte vërejtje edhe për sjelljen e tij ndaj kolegëve magjistratë.
Sipas hetimeve të SPAK, Llaho me veprimet dhe mosveprimet e tij ka kryer shkelje, pasi nuk zbatoi vendimin e gjykatës për thellim hetimesh në një çështje të caktuar me qëllim që të favorizonte vjehrrin e tij.
Aktualisht, ai nuk ushtron detyrën as si drejtues as si prokuror, për shkak se GJKKO e pezulloi nga detyra me akuzën e “korrupsioni pasiv i gjyqtarëve, prokurorëve dhe funksionarëve të tjerë të drejtësisë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
