Për herë të fundit, Dinamo dhe Partizani, dy nga skuadrat më të mëdha të futbollit shqiptar, janë ndeshur në Kategorinë e Parë, për shkak të problematikave që kanë kaluar. Derbi i fundit në Superiore mes tyre i takon vitit 2009, më pas Partizani ra në kategoritë inferiore, ashtu si Dinamo pas sezonit 2011-2012.
Sot, në orën 19:45, këto dy skuadra ritakohen në derbin e parë sezonal, që nuk zhvillohet në kryeqytet, por në “Elbasan Arena”. Është ndeshja e parë e javës së katërt të Abissnet Superiores, pas së cilës kampionati ndërpritet për shkak të dy sfidave të Kombëtares me Hungarinë dhe Poloninë.
Dinamo vjen në derbi në një pozicion më komod, me 5 pikë pas 3 ndeshjeve të para. Mungesa e pikëve vë në presion Partizanin, që ka vetëm 2 barazime dhe 1 humbje deri tani. Megjithatë, derbit janë gjithmonë të paparashikueshëm dhe mund të përmbysin çdo situatë. Të kuqtë nuk kanë çfarë humbin dhe do të jenë më kërkues në këtë 90-minutësh.
Trajnerët Bledi Shkëmbi dhe Ilir Daja e kanë të plotë grupin e futbollistëve dhe mund të bëjnë zgjedhjet më të mira. Problemi kryesor i Dinamos dhe Partizanit, por edhe gjithë skuadrave të Superiores, është sulmi. Golat në këto 3 javë të para kanë qenë të paktë. Dinamo ka shënuar vetëm 3 gola deri tani, kurse Partizani 2 gola.
Java e 4-t vazhdon të shtunën dhe të dielën me ndeshjet Egnatia-Kastrioti, Skënderbeu-Vlalznia, Tirana-Laçi dhe Kukësi-Teuta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
