Gazeta Si – Në një raport të fundit të ‘CIES’, institutit të statistikave, është bërë një analizë e skuadrave që kanë vlerën më të madhe në merkato. Dhe pas kësaj analize në vend të parë ka dalë Mançester Siti.
Edicioni i 395-të i ‘CIES Football Observatory Weekly Post’ ka dalë në përfundimin se Mançester Siti deri tani ka rreshtuar në fushë formacionet më të kushtueshme nga pikëpamja e kostos së transferimeve. Mesatarisht, formacionet titullare të ‘qytetarëve’ në kampionat përfshijnë lojtarë, për të cilët klubi ka investuar deri në 605 milionë euro.
PSG me 510 milionë euro dhe Mançester Junajtid me 480 milionë euro kompletojnë podin.
Formacioni titullar më i shtrenjtë është ai që Mançester Siti kishte në fushë më 22 tetor për fitoren 3-1 kundër Brajtonit, me 726 milionë euro. Formacionin më ‘ekonomik’ skuadra e Guardiolës e ka pasur më 31 gusht, në fitoren 6-0 ndaj Notingam Forest, me 538 milionë euro.
Për PSG-në vlerat ekstreme shkojnë nga 610 milionë euro për fitoren 1-0 kundër Olimpikut të Marsejës, deri në 332 milionë euro për barazimin 0-0 kundër Reims.
Real Madrid me 370 milionë euro, Juventusi me 300 milionë euro dhe Bajern Mynih me 294 milionë euro regjistrojnë shifrat më të larta në 5-shen e kampionateve më të forta europiane. Kur të dalë raporti i detajuar do të mësohet pozicioni i çdo ekipi në këtë renditje specifike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
