Pandemia ka marrë përmasa të frikshme në rajon, duke prekur në masë të rinjtë dhe të pa vaksinuarit.
Në Kosovë një 29-vjeçare shtatzënë ka humbur jetën si pasojë e infektimit me variantin Delta të Covid-19. Po ashtu në Maqedoninë e Veriut një 15-vjeçare nga Tetova ka ndërruar jetë pas gjendjes së rënduar shëndetësore nga Covid-19.
Raportohet se 4 gra shtatzëna ndodhen në spital në gjendje të rëndë në Kosovë, ndërsa ministria e Shëndetësisë iu bën thirrje këtyre të të fundit që të marrin vaksinën anti-Covid. Në 24 orët e fundit në Kosovë janë regjistruar 22 viktima dhe 1894 të infektuar.
Shërbimi Spitalor Klinik Universitar i Kosovës (SHSKUK), ka njoftuar të mërkurën (1 shtator) se 1220 pacientë janë duke u trajtuar në spitalet e përgjithshme në Kosovë.
“Nga 1220 pacientë, 1051 ndodhen në oksigjen ndërsa 59 në kujdes intensiv, në gjendje të rënduar shëndetësore”, thuhet në raport. Në Kosovë u konfirmuan edhe 26 viktima nga koronavirusi të martën.
Së shpejti, në Prishtinë pritet të arrijnë mbi 450,000 doza të vaksinës Pfizer/BioNTech, si donacion nga Shtetet e Bashkuara, tha të martën ministri i Shëndetësisë i Kosovës, Arben Vitia.
Duke folur në një konferencë për media në Prishtinë, Vitia tha se Kosova ka mjaftueshëm doza të vaksinës Pfizer/BioNTech dhe AstraZeneca.
“Edhe një herë ju bëj thirrje që të mos zgjedhim se cilën vaksinë ta marrim në një situatë si kjo. E rëndësishme është që të vaksinohemi sa më parë”, tha Vitia.
“Ne jemi i vetmi vend në rajon që kemi administruar vetëm vaksina të aprovuara nga Agjencia Europiane e Barnave dhe Administrata e Ushqimit dhe Barnave e SHBA-së”, shtoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
