.png)
Gazeta Si – Trajneri i Kombëtares shqiptare, Silvinjo, është zyrtarisht shtetas shqiptar. Gjatë ceremonisë së mbrëmjes së sotme të organizuar nga FSHF, braziliani ka marrë pasaportën shqiptare në praninë e Presidentit të Republikës Bajram Begaj, Kryeministrit Edi Rama dhe presidentit të FSHF-së Armand Duka.
Silvinjo bëhet kështu trajneri i dytë i huaj që në pak vite merr nënshtetësinë shqiptare, pas italianit Xhani De Biazi.
Gjatë ceremonisë, kryeministri Rama tha: “Kam privilegjin për të thënë dy fjalë. Duhet të përgëzojmë me gjithë zemër të gjithë atë që mundësuan suksesin e jashtëzakonshëm për Shqipërinë. Përgëzimin dua ta filloj nga De Biazi, i cili na tregoi se kjo nuk është një ëndërr e pamundur. Dua ta vazhdoj me Rejën dhe ta mbyll me Silvinjon”.
Kreu i qeverisë, pasi Silvinjos iu dha pasaporta shqiptare, thirri mbrojtësin Elseid Hysaj për t’i dorëzuar pasaportat diplomatike të lojtarëve të Shqipërisë. “Kur Shqipëria u kualifikua në Europianin e 2016-ës, ne u dhamë të gjithë sportistëve pasaport diplomatike.
Kur nuk u kualifikuan pas 4 vitesh, pasaportave iu dogj afati. Tani do të kthehet sërish pasaporta diplomatike dhe nga kjo do të përfitojnë shumë lojtarë që e kanë për herë të parë pasaportën diplomatike. Thirra Hysajn, që ishte mosbesues që kjo do të ndodhte, ai do të mësojë tani se unë atë që them, e mbaj”, – shtoi Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
