Si ati, edhe i biri. Do të jetë sërish një Shumaker në timonin e një Ferrari në të ardhmen. Mik, djali i Mikael Shumaker, do të jetë një nga pilotët rezervë të skuderisë italiane për sezonin 2022 të Formulës 1, përveçse do të garojë me Has.
Njoftimin e ka dhënë drejtuesi kryesor i Ferrarit, Matia Binoto: “Nuk duhet të harrojmë se ai është tashmë një pilot i Ferrarit, bën pjesë në akademinë tonë, ku identifikohen pilotët e së ardhmes, – ka shpjeguar Binoto në një konferencë shtypi online. – Nëse je pjesëtar i saj dhe ke sukses, do ta kesh me siguri një mundësi”.
Binoto dhe Ferrari besojnë te rritja e pilotit gjerman, që këtë vit e mbylli Botërorin në vend të 19-të dhe pa pikë, por në timonin e një makine Has pak brilante. “Ka bërë mirë dhe po rritet, jo vetëm në konsistencë, por edhe në shpejtësi”, – ka thënë më tej Binoto.
Mik, i cili mbush 23 vjeç më 22 mars, do të ketë rolin e pilotit rezervë, që do të thotë se, në rast se një nga dy pilotët kryesorë do të dëmtohen, ai do ta zëvendësojë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
