Ndeshjen me Andorrën pakkush e merr në konsideratë, është një formalitet që duhet bërë dhe 3 pikë që duhen marrë, për t’i mbyllur këto kualifikuese të Botërorit në vend të tretë, me 18 pikë. Por edhe kjo ndeshje kërkon seriozitet për të shmangur ndonjë surprizë të pakëndshme.
Lojtarë që kryesisht kanë qëndruar në stol kanë shansin e mirë për të treguar vlerat më të mira. Trajneri Edi Reja ka tri mungesa të sigurta për këtë ndeshje të fundit, Cikalleshin dhe Gjasulën të skualifikuar, si dhe Brojën që ka qëndruar në Angli dhe nuk ka udhëtuar me skuadrën për në Tiranë.
Sulmuesi i Southemptonit është lënë pushim për të kaluar 100% dëmtimin, por kuptohet që edhe qëndrimi në tribunë ndaj Anglisë mund të ketë krijuar një lloj qejfmbetjeje.
Me shumë mundësi, ndaj Andorrës do të mungojnë edhe Kumbulla me Baren, të cilët lanë fushën të dëmtuar që në fillim të ndeshjes. Mungesat do të shkonin kështu në 5, gati gjysma e ekipit, çka do të thotë se formacioni do të ketë shumë ndryshime më 15 nëntor.
Hapësirë pritet të marrin lojtarë si Mihaj në mbrojtje, apo edhe Hoxhallari ose Doka. Laçi dhe Ramadani priten titullarë në mesfushë, ashtu si dhe Bajrami. Në sulm, në mungesë të Cikalleshit dhe Brojës, nga minuta e parë pritet të luajnë Bekim Balaj dhe Myrto Uzuni.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
