Gazeta Si – Vllaznia në futboll për femra është mundur sot 1-2 nga islandezet e Valur në finalen e raundit të parë. Ëndrra europiane është mbyllur shpejt këtë herë për kampionet e Shqipërisë, që një vit më parë shkonin deri në fazën e grupeve të Ligës së Kampionëve.
Kampionët e Islandës shënuan nga një gol në çdo pjesë në stadiumin “Loro Boriçi”, ndërsa goli i Megi Doçit në kohën shtesë shërbeu vetëm për statistika. As ndihma e tifozëve në shkallët e stadiumit të Shkodrës nuk i ndihmoi vajzat kuqeblu.
Vllaznia nuk bëri një ndeshje të mirë në fakt, duke hasur shumë vështirësi ndaj islandezeve, të cilët ishin më lart dhe e merituan kualifikimin. Pavarësisht merkatos së bërë nga drejtuesit e skuadrës pak kohë më parë, aventura europiane është mbyllur këtu.
Kujtojmë që Vllaznia eliminoi Hajvalinë e Kosovës në gjysmëfinale tri ditë më parë, kurse Valur kishte eliminuar kampionet e Turqisë në gjysmëfinalen tjetër të grupit. Nëse fitonte sot, skuadra shkodrane do të shkonte në ‘Play-off’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
