Shqiptarët bëjnë pak aktivitet fizik dhe ushtrime aerobike

Shqiptarët nuk kryejnë mjaftueshëm aktivitet fizik dhe ushtrime aerobike. Kjo është ajo çfarë nënvizohet në një raport të Institutit të Shëndetit Publik, i cili u referohet dy studimeve: Vëzhgimit Kombëtar për sjelljen në lidhje me shëndetin te fëmijët në moshë shkollore (HBSC), një nismë e Organizatës Botërore të Shëndetësisë në vende të ndryshme, si dhe studimit nga Qendra e Shkencës dhe Industrisë (COSI).

HBSC dhe COSI janë dy studime, të cilat kanë vlerësuar mungesën e aktivitetit fizik tek fëmijët 11-15 vjeç (HBSC) dhe 8-9 vjeç (COSI), ndërkohë që në studimin më të fundit të ADHS- Anketa Demografike dhe Shëndetësore e Shqipërisë është vlerësuar niveli i aktivitetit fizik tek të rriturit.

Sipas raportit, është për t’u vërejtur se ulja e aktivitetit fizik shpesh përkon me rritjen e nivelit kombëtar bruto. Gjithashtu, jeta sedentare në punë dhe familje, si dhe rritja e modeleve “pasive” të transportit kontribuojnë në aktivitet fizik të pamjaftueshëm.

Vajzat, më pak aktive se djemtë

Sipas të dhënave, vajzat 11-13-15 vjeç janë më pak aktive krahasuar me djemtë e po të njëjtës moshë.

Në studimin më të fundit ADHS, për të vlerësuar nivelin e kryerjes së ushtrimeve aerobike gjatë javës, intervistuesit u pyetën nëse kishin kryer aktivitete të tilla, si: ecje, biçikletë, joga apo ushtrime të tjera që rrisnin punën e zemrës.

Mbi 80 përqind e të rriturve nuk kryejnë aktivitet fizik

Në total, 12 % e grave të moshës 15-49 raportojnë të kenë kryer ndonjë formë të ushtrimeve aerobike 5 deri 7 ditë të javës, vetëm 4% i kryejnë këto ushtrime 3 deri 4 herë në javë, 3% i kryejnë 1 deri 2 herë në javë dhe 82% e të intervistuarve nuk kryejnë fare ushtrime aerobike.

Sipas të dhënave, tek adoleshentët në vendin tonë, përqindja e moskryerjes së aktivitetit fizik është rreth 68 % dhe rritet me rritjen e moshës, duke shkuar deri në 84 % për të intervistuarit e grup-moshës 50-59 vjeç.

Në vitin 2010, OBSH publikoi një set rekomandimesh, duke u fokusuar në parandalimin primar të sëmundjeve jo-të transmetueshme përmes aktivitetit fizik.

Në këtë publikim propozoheshin strategji për t’u ndjekur, për të arritur nivelet e rekomanduara të aktivitetit fizik global, të tilla, si: skicimi dhe zbatimi i udhëzuesve kombëtarë për rritjen e aktivitetit fizik; përdorimi i mjeteve të komunikimit masiv për të rritur ndërgjegjësimin e përfitimeve që sjell aktiviteti fizik; survejimi dhe monitorimi i mekanizmave që promovojnë aktivitetin fizik.

Sipas të dhënave të raportit, kryerja e ushtrimeve aerobike, të cilat ndikojnë në rritjen e aktivitetit të zemrës duket se vjen në ulje me rritjen e moshës.

Aktiviteti i pamjaftueshëm fizik është një ndër faktorët risk kryesorë për sëmundjet jo-të transmetueshme të tilla si sëmundjet kardiovaskulare, tumoret apo diabeti, si dhe shkaktari i katërt kryesor për vdekshmërinë në të gjithë botën (6% e vdekjeve në botë).

Në vitin 2010, vlerësohej që në botë, një në katër adultë dhe rreth 80 % e adoleshentëve nuk kryenin mjaftueshëm aktivitet fizik. Blerina Goce

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.