.png)
Shqipëria për herë të parë nuk ka pranuar të linjëzojë me Bashkimin Europian, qëndrimin për situatën e krijuar në Kosovë dhe procesin e dialogut me Serbinë. Burime pranë Qeverisë thanë se ka qenë pikërisht deklarata e shefit të politikës së jashtme të Unionit, Joseph Borrell, që i trajtonte të dyja palët njësoj, çfarë ka sjellë edhe mospajtimin e Tiranës zyrtare, e shprehur kjo në rrugë diplomatike.
Kritikat e Brukselit si ndaj Kosovës, ashtu edhe ndaj Serbisë, janë arsyeja kryesore që kanë detyruar Shqipërinë të mos mbështesë qëndrimin e Bashkimit Europian, në kushtet kur Tirana vëren se me zhvillimet e fundit faji peshon në krahun e Beogradit.
Veçanërisht, thirrja e Borrell që si pjesë e deeskalimit duhet të ishte mospërdorimi i forcave speciale në veriun e Kosovës, dhe ndërkohë vetëm pak ditë më vonë aty u vra një efektiv i Policisë nga agresorët serbë në manastirin e Banjskës, e bëjnë deklaratën e Brukselit të mos reflektojë realitetin e ngjarjeve të fundit.
Tirana e ka bërë të qartë këtë dhe pret nga Bashkimi Europian që të ketë një qëndrim të ri mbi situatën, me qëllim që edhe Shqipëria t’i rikthehet përsëri linjëzimit me Unionin, sa i përket Kosovës dhe procesit të dialogut me Serbinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
