Shqipëria ndër vendet e para në Europë për prodhim të energjisë së rinovueshme

14:45 - 27 Janar 2022

Shqipëria është vendi me përqindjen më të lartë të përdorimit të burimeve të rinovueshme të energjisë në rajon dhe ndër të parat në Europë. Energjia e rinovueshme në vitin 2020 ishte 45% nga totali i prodhuar dhe 99.9% e asaj të konsumuar.

25% e energjisë së konsumuar nga shqiptarët gjatë vitit 2020 është shpenzuar për ngrohje dhe ftohje. Shifër që është ulur në raport 15 vjeçar, por është rritur nga vitet e fundit.

Por në përdorimin e energjisë për transport, Shqipëria renditet ndër të fundit, me pothuajse 1% përdorim energjie për lëvizje me mjete motorike.

Në të gjithë Europën, nivelin më të lartë të prodhimit të energjisë nga burime të rinovueshme e ka Islanda me 83.7% të energjisë në total, Norvegjia me 77.4% dhe Suedia me 60.1%, ndjekur më pas nga vendi jonë. Nivelin më të ulët e ka Malta, me vetëm 10.7% energji të rinovueshme të prodhuar.

Në rajon, pas vendit tonë qëndron Mali i Zi, me 43.7%. Serbia është e treta e renditur në nivel rajoni dhe ndiqet nga Kosova dhe nga Maqedonia e Veriut, me 25.9%, 24.4% dhe 19.2% respektivisht.

Raporti i Eurostat vlerëson se Europa ka bërë një progres nga viti 2009-2019 në zgjerimin e burimeve të energjisë në tre alternativa të reja, siç është energjia nga era, nga dielli dhe nga biofosilet, përfshirë mbetjet e rinovueshme. Në vitin 2020, në vendet e BE-së, energjia e konsumuar ishte 37.5% e prodhuar nga burime të rigjenerueshme.

Energjia hidrike dhe eolike përbën më shumë se 2/3 e energjisë së prodhuar në total në kontinent. 1/3 ishte një përzierje midis energjisë solare, biofosilet dhe të tjera.

Energjia solare është ajo me zhvillimin më të shpejtë që nga viti 2008, kur raportohej vetëm 1% dhe tani 14%. Rritja ka qenë dramatike nga 7.4 twh në 2008 dhe 144.2 twh në 2020.

Shqipëria është furnizuar gjithmonë me energji nga hidrocentralet, burim i rinovueshme hidrik, por vitet e fundit po zhvillohen projekte për të zgjeruar dhe më tej opsionet duke shfrytëzuar kapacitetet natyrore të Shqipërisë, si parqe fotovoltaike dhe eolike.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.