Ndërkohë që Shqipëria pret të marrë sot rreth 38 mijë dozat e para të vaksinës së Astrazenecas, shumica e vendeve europiane po pezullojnë, qoftë plotësisht, qoftë pjesërisht, shpërndarjen e saj, pasi një sërë qytetarësh shfaqën mpiksje gjakut pas vaksinimit.
Me rritjen e numrit të qytetarëve që humbën jetën nga mpiksja e gjakut, pas marrjes së vaksinës, Austria, Danimarka, Estonia, Lituania, Luksemburgu, Letonia dhe Italia, Norvegjia dhe Islanda, kanë pezulluar shpërndarjen e të paktën disa dozave të vaksinës së kompanisë anglo-suedeze si masë paraprake.
Efekti domino në të gjithë Europën filloi më 7 mars, kur Austria njoftoi se po pezullonte përhapjen e një grupi specifik të këtyre vaksinave, pasi një person vdiq dhe një tjetër u sëmur rëndë nga mpiksja e gjakut pas vaksinimit.
Grupi i vaksinave që mban kodin ABV5300, u dorëzua në 17 vende europiane, Austri, Bullgari, Qipro, Danimarkë, Estoni, Francë, Greqi, Islandë, Irlandë, Letoni, Lituani, Luksemburg, Maltë, Holandë, Poloni, Spanjë dhe Suedi). Europa ka marrë një milion doza të këtij grupi vaksinash.
Por ky grup vaksinash nuk është i vetmi që po lidhet me mpiksjen e gjakut. Italia njoftoi mbrëmjen e së enjtes ndalimin e një grupi tjetër vaksinash, me kodin ABV2856. Agjencia italiane e lajmeve ANSA njoftoi se vendimi u mor pas vdekjes së dy qytetarëve në Siçili, për shkak të mpiksjes së gjakut.
Por nga vijnë këto doza “problematike” që janë shpërndarë në vendet europiane dhe a janë të njëjta me ato që pritet të mbërrijnë në Shqipëri.
Dozat e fundit të Astrazenecas të shpërndara në Bashkimin Europian janë prodhuar në dy fabrika: në Baltimore në SHBA dhe nga instituti shtetëror në Indi. Në një raport ekskluziv, agjencia e lajmeve “Reuters” raporton sot se pas ndalimit të shpërndarjes nga një sërë vendesh të BE-së, SHBA-ja ka ndaluar eksportin e vaksinave në Europë. BE gjithashtu ka qene duke siguronte doza shtesë nga India, ku vaksinat e saj prodhohen nga Instituti Serum. Pas problemeve të mpikjes së gjakut të të vaksinuarve, Reuters raporton sot se BE ka dërguar eskpertë në fabrikën e prodhimit të institutit Serumit, për të parë nëse ka parregullsi në procesin e prodhimit.
Shqipëria do t’i marrë 38 mijë dozat e vaksinës Astrazeneca nga mekanizmi COVAX i Organizatës Botërore të Shëndetësisë. Në planin e shpërndarjes, COVAX thotë se i merr vaksinat e Astrazenecës nga fabrika në Indi.
Agjencia Europiane e Barnave thotë se nga 10 marsi, u raportuan 30 viktima të lidhura me mpiksjen e gjakut nga afër pesë milion njerëz që kanë marrë vaksinën Oxford / AstraZeneca në Europë, duke përjashtuar Mbretërinë e Bashkuar, e cila këmbëngul se nuk ka asnjë tregues se vaksina shkakton mpiksje gjaku. Mbi 3500 qytetarë europianë që kanë marrë vaksinës kanë shfaqur probleme me mpiksjen e gjakut 24 orë pas marrjes së vaksinës, duke i çuar disa prej tyre drejt arrestit kardiak dhe trompozës.
Zyrtarët e vendeve europiane thonë se ata kanë marrë raporte për mpiksje gjaku fatale ose kërcënuese për jetën nga një sërë njerëzish që kishin marrë kohët e fundit një dozë të vaksinës Oxford-AstraZeneca. Një studim i plotë mbi grup moshën, prejardhjen dhe gjininë e qytetarëve pritet të nisë së shpejti. Çdo medikament i paprovuar më parë, përfshirë vaksinat, mbart rrezikun e disa efekteve anësore për disa njerëz, por shumica janë zakonisht të lehta.
“Megjithëse një problem me prodhimin e vaksinave konsiderohet i pamundur në këtë fazë, cilësia e serisë është duke u hetuar,” tha nga ana tjetër Agjencia Europiane e Miratimit të Barnave (EMA).
Në një deklaratë të enjten në mbrëmje, një zëdhënës i kompanisë tha se një analizë e të dhënave të sigurisë prej më shumë se 10 milion të dhënave ka treguar se vaksina nuk lidhet me embolinë pulmonare ose trombozën e venave. Por vendet europiane nuk janë bindur nga deklaratat e kompansië, duke u shprehur se siguria e qytetarëve vinte në radhë të parë.
AstraZeneca ishte kritikuar më parë në lidhje me efikasitetin e vaksinës, duke bërë fillimisht që një sërë vendesh europiane të ndalonin shpërndarjen e saj tek të moshuarit.
Në njoftimin e parë për shtyp të kompanisë në lidhje me efikasitetin e vaksinës thuhet se ishte 90% efektive, por më pas u tha se 62% efektive në parandalimin e COVID-19.
Çfarë dimë për vaksinën e AstraZeneca?
Vaksina ka disa përparësi: është më e lirë dhe më e lehtë për tu shpërndarë sesa vaksinat Pfizer dhe Moderna dhe i është dhënë një dritë jeshile nga disa rregullatorë duke përfshirë Britaninë, BE-në dhe Organizatën Botërore të Shëndetësisë.
Rregullatorët kanë thënë se vaksina shkakton vetëm efekte anësore të lehta dhe është e sigurt dhe efektive në parandalimin e COVID-19. Vaksina përdor një virus të dobësuar gjenetikisht dhe çon drejt fitimit të imunitetit. Ajo që shqetëson autoritetet europiane është se pjesa e madhe e të infektuarve me Covid-19 shfaqin mpiksje të lehtë të gjakut, e cila ka qënë edhe një ndër arsyet e vdekshmërisë së madhe të virusit.
Deri më tani, për shkak të dyshimeve mbi efektivitetin e saj, mijëra punonjës të kujdesit shëndetësor në Europë kanë refuzuar të bëjnë vaksinën e kompanisë anglo-suedeze. Ata argumentuan se donin të merrnin vaksinat e mARN nga Pfizer ose Moderna, duke qënë qindra mijë vaksina të AstraZeneca të papërdorura.
Deri të enjten, Franca, Gjermania, Italia dhe Polonia kishin përdorur më pak se gjysmën e dozave të vaksinës AstraZeneca që kanë marrë. Këto vende kanë marrë numrin më të lartë të dozave, e ndjekur nga Spanja, e cila ka përdorur rreth 60% të stokut të saj në dispozicion dhe po vazhdon përpara me vaksinimet pavarësisht zhvillimeve të fundit.
Kur Agjencia Evropiane e Barnave miratoi vaksinën AstraZeneca në fund të janarit, ajo tha që produkti ishte i sigurt për t’u përdorur tek njerëzit mbi 18 vjeç. Në atë kohë, pjesëmarrësit në studim ishin kryesisht të moshës nga 18 deri në 55 vjeç, kështu që nuk kishte shumë të dhëna të disponueshme për efektivitetin e vaksinës tek të moshuarit. Megjithatë, EMA e aprovoi edhe për vaksinimin e të moshuarve por kjo nuk i bindi zyrtarët shëndetësorë në disa vende europiane, të cilët u përqendruan në përparësinë e dhënies së vaksinës së Astrazeneca vetëm tek të rinjtë.
Para se të shfaqeshin dyshimet se vaksina mund të shkaktojë mpiksje gjaku, zyrtarët europiane ishin të shqetësuar për sasinë e vaksinave që do të merrnin nga kjo kompani. AstraZeneca fillimisht kishte premtuar 100 milion doza për tremujorin e parë, por shkurtoi dërgesat në 31 milion. Për tremujorin e dytë, kompania tha se do të shpërndajë 100 milion doza, por sipas një raporti të Reuters e ka ulur sërish sasinë të enjten në vetëm 30 milionë doza.
Burimet: “Reuters”, “Politico.Eu”, “New York Times”, “Euronews”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
