Shqipëria, ecuri pozitive në luftën kundër pastrimit të parave, por ka plotësuar vetëm 7 nga 40 kërkesa

Nga Gazeta “SI” – Shqipëria ka përmirësuar masat e parandalimit të luftës kundër pastrimit të parave dhe financimit të terroristëve, duke treguar progres sipas Moneyval, nga Këshilli i Europës.

Raporti tregon se hapat pozitivë janë bërë në dy drejtime duke rritur përputhshmërinë me direktivat europiane në “shumë e përputhshme” nga “pjesërisht e përputhshme”, lidhur me transparencën, pronarët përfitues dhe mbikëqyrja e institucioneve financiare.

Përmirësim është bërë edhe në fushën e ndihmës së ndërsjellë juridike (MLA) në lidhje me ngrirjen e aseteve dhe konfiskimin, nga “pjesërisht e përputhshme” në “e përputhshme”. Por KE nuk përcakton dot masat specifike që janë implementuar.

Zhvillime të mëtejshme pozitive të vërejtura nga Moneyval përfshijnë miratimin e Ligjit “Për regjistrin e Pronarëve Përfitues”, i cili merr dhe mban informacionet e nevojshme të PP-ve.

Një tjetër hap pozitiv për Shqipërisë, sipas Moneyval, është edhe masat për licencim të institucioneve financiare jo-banka.

Në fushën e ndihmës së ndërsjellë juridike, Shqipëria ka krijuar mekanizmat e nevojshëm për ekzekutimin e urdhrave të konfiskimit nga të huajt, ndarjen e aseteve të konfiskuara me shtetet e huaja dhe ofrimin e ndihmës për konfiskimet pa dënim.

Në konkluzion, Moneyval vlerëson se Shqipëria ka përmbushur disa nga kërkesat teknike që i janë kërkuar, në tre vite.

Janë arritur 7 nga 40 rekomandime dhe ka akoma pak përmirësim në 29 rekomandime.

Pikat më problematike sipas KE-së, ku vendi jonë nuk ka bërë progres lidhen me pikën 25, ku ishte kërkuar pavarësi e biznesit nga administratorët. Ishte kërkuar të kërkohej llogari për statuset dhe transaksionet e një administratori kur hyn në marrëdhënie biznesi. Marrja e informacionit nga autoritetet mbi administratorët dhe të dhënat që ata posedojnë.

As pika 26 nuk ka përmirësim ku bëhet fjalë për rregullimin e marrëdhënies së biznesit me aksionerët dhe administratorët. Përmendet dhe mungesa e vlerësimit nga Banka e Shqipërisë mbi paratë e pista dhe luftës kundër terrorizmit.

Autoritetet shqiptare kanë bërë të ditur se një pjesë e kërkesave që ishin parashikuar edhe për vlerësime nëpër subjekte nuk kanë realizuar për shkak të situatës së COVID-19.

Pika 28 është gjithashtu e paplotësuar ku bëhet fjalë për lidhjen kriminale dhe kazinotë. Nuk ka ndryshime për licencimin e kumarit online.

Pika 15, mbi mallrat digjitalë. Shqipërisë i mungojnë të dhënat për mallrat digjital dhe rrezikun e tyre, ndonëse nuk ka asnjë të licencuar.

Në tërësi, Shqipëria nuk ka vlerësime “të papajtueshme”.

Moneyval thekson se Shqipëria do të vazhdojë të mbetet në monitorim dhe të vëzhgohet.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.