Gazeta Si – Arbnor Muja, futbollisti nga Mitrovica, do të përfaqësojë Kombëtaren shqiptare në vazhdim. Lajmi nuk është ende zyrtar, por sipas ‘Sport Ekspres’ ai ka vendosur të luajë për skuadrën e drejtuar nga trajneri Silvinjo.
E përforcon këtë lajm edhe fakti se sulmuesi anësor, i sapo shpallur kampion në Belgjikë me Antverp, mungonte në listën e trajnerit Zhires te Kosova. Muja, 24 vjeç, ka bërë një paraqitje të mirë në Belgjikë sezonin e fundit. Më parë ai ka luajtur me Skënderbeun në Shqipëri dhe Dritën e Trepçën në Kosovë.
Gjatë konferencës për shtyp trajneri Silvinjo u shpreh se mungesa e Odise Roshit në listë të bënte me faktin se Shqipëria ka lojtarë që në këtë moment mund të bëjnë më mirë se fieraku. Ai nuk përmendi emra, por Muja aktivizohet pikërisht në të njëjtin rol me Roshin.
Futbollisti kosovar gjithsesi pritet të bashkohet me kuqezinjtë pas ndeshjeve të qershorit me Moldavinë dhe Ishujt Faroe. Teksa festonte titullin kampion në Belgjikë, Muja është fotografuar me flamurin kuqezi mbi shpatulla dhe jo atë të Kosovës.
Vendimi i tij pritet të shkaktojë reagime në Kosovë. Me kuqezinjtë luajnë aktualisht disa lojtarë me origjinë apo të lindur në Kosovë, si Berisha, Ismajli, Gjimshiti e ndonjë tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
