.png)
Gazeta Si - Presidenti i Serbisë, Aleksandar Vuçiç, tha të dielën se autoritetet serbe po zhvillojnë një hetim për një shpërthim ndaj një kanali të Ibër-Lepencit në veri të Kosovës, duke hedhur poshtë përsëri akuzat e autoriteteve kosovare se Beogradi ka gisht në sulmin ndaj infrastrukturës jetike kosovare.
Më herët, Kosova dhe Bashkimi Evropian e kanë cilësuar këtë sulm si akt terrorist. Shpërthimi mbrëmjen e të premtes, i shkaktoi dëme të konsiderueshme kanalit të ujit të Ibër-Lepencit në fshatin Varragë të komunës së Zubin Potokut, duke rritur frikën se shumë pjesë të vendit do të mbeteshin pa ujë dhe rrymë.
“Përveç që nuk kemi asnjë lidhje me këtë, ne kemi qenë aq të drejtë dhe, si një shtet serioz, nuk jemi marrë me akuza dhe nuk kemi thënë se ai sulm është urdhëruar drejtpërdrejt nga Kurti”, tha Vuçiç duke iu referuar kryeministrit të Kosovës, i cili e akuzoi Serbinë për “dirigjimin” e këtij sulmi “terrorist dhe kriminal”.
Ai tha se ky është “sulm hibrid ndaj një shteti” që do të harrohet brenda dy ditësh, por se Serbia do të insistojë për të.
Ai tha se hetimet do ta zbardhin të vërtetën, sepse “edhe ne po zhvillojmë hetimin tonë”. “Kemi disa dyshime të caktuara, por hetimi do të tregojë se kush e ka urdhëruar. Mendoj se kemi disa njohuri për atë se kush mund të jetë autori", tha Vuçiç.
Ai pretendoi se që nga viti 1985, “ekziston një ide për të ndryshuar rrjedhën” e lumit Ibër, për ta lënë gjoja Gazivodën pa ujë.
Siç deklaroi ai, me vendim të Qeverisë së Serbisë mund të ndryshohet rrjedha e lumit Ibër, por ai vetë ka qenë kundër kësaj, kur iu propozua, madje edhe kur ishte kryeministër, dhe nuk dëshironte që “natyra të përdoret për nevoja politike”.
Vuçiç tha se qëllimi i kësaj është “të ngadalësohet” rruga e integrimit evropian të Serbisë, pasi javën e ardhshme pritet vendimi për hapjen e kapitujve, si dhe të shpallet Lista Serbe organizatë terroriste përpara afatit për dorëzimin e listës zgjedhore për zgjedhjet e 9 shkurtit në Kosovë.
Negociatat mes Beogradit dhe Brukselit janë praktikisht të ngrira tash e tre vjet, kryeishst për shkak të mosvendosjes së sanksioneve kundër Rusisë.
Lista Serbe – partia më e madhe e serbëve në Kosovë –pritet të marrë pjesë në zgjedhjet e përgjithshme parlamentare të 9 shkurtit në Kosovë, sipas kryetarit të saj Zllatan Ellek.
Ndërkohë, duke folur për mjetin shpërthyes që u përdor për ta dëmtuar kanalin e Ibër-Lepencit, Vuçiç tha se është “i sigurt” se bëhet fjalë për eksploziv ushtarak serb, “pasi mund te ishte konfiskuar gjatë një prej bastisjeve”, duke aluduar në Policinë e Kosovës.
Një ditë më parë, ministri i Brendshëm i Kosovës, Xhelal Sveçla tha se eksplozivi i përdorur në sulmin ndaj kanalit “është e pamundur të gjendet në tregun e zi, nëse nuk furnizohet drejtpërdrejt nga depot e ushtrisë”.
Vuçiç tha se Kurti i kishte kërkuar leje KFOR-it që Forcat e Sigurisë së Kosovës (FSK) të vendoseshin në veri të Kosovës, “nëntë minuta” pasi ishte njoftuar për shpërthimin në kanalin e Ibër-Lepencit.
“Po pyes NATO-n dhe KFOR-in, a po flas të vërtetën apo jo?” tha Vuçiç. Shkuarjen e FSK-së apo vendosjen e bazave të saj në komunat veriore të banuara me shumicë serbe e pamundëson një marrëveshje e institucioneve të Kosovës me Aleancën e NATO-s.
Më 2013, nëpërmjet një letërkëmbimi, kryeministri i atëhershëm i Kosovës, Hashim Thaçi, e siguroi NATO-n se FSK-ja nuk shkon në veri pa pëlqimin paraprak të KFOR-it.
Vuçiç i akuzoi autoritetet kosovare se arrestuan “njerëz që nuk kishin asnjë lidhje me sulmin dhe për këtë
arsye shtatë prej tyre u liruan”.
“Kështu nuk zhvillohen hetime serioze, gjithçka ishte një shfaqje për opinionin ndërkombëtar”, tha ai.
Autoritetet kosovare të sigurisë njoftuan të shtunën vonë se tetë të dyshuar u arrestuan gjatë një aksioni të gjerë në veri të Kosovës në lidhje me këtë sulm që thanë se ishte më i rëndi ndaj infrastrukturës kritike të vendit që nga paslufta.
Ministri Sveçla tha se të arrestuarit dyshohen edhe për lidhje dhe nxitje të sulmeve të fundit në veri të vendit gjatë kësaj jave, si sulmi me granata dore në stacionin policor dhe në ndërtesën e Komunës në Zveçan.
Autoritetet kosovare të sigurisë konfiskuan edhe armatim gjatë bastisjes në veri të shtunën, për të cilin thanë se mund të lidhet me sulmet e kësaj jave dhe me raste të tjera që autoritetet janë duke i trajtuar.
Gjendja e në veriun e Kosovës të banuar me shumicë serbe vazhdon të jetë e tensionuar tash e një vit, prej kur një grup serbësh të armatosur e sulmuan Policinë e Kosovës në fshatin Banjskë më 24 shtator 2023, duke e vrarë një rreshter.
Prej atëherë, Policia e Kosovës ka konfiskuar sasi të ndryshme armatimi në disa raste./REL/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
