Lista Serbe, partia më e madhe e serbëve në Kosovë ka reaguar pas shpërthimit të ndodhur në orët e para të mëngjesit në Mitrovicën e Veriut.
Përmes një postimi në rrjetet sociale, Lista Serbe ka dënuar ngjarjen e ndodhur dhe pretendon se kjo është bërë qëllimisht për të arsyetuar praninë e shtuar të forcave speciale të armatosura në rrugët e Mitrovicës.
Lista Serbe ka kërkuar nga KFOR-i dhe EULEX-i që të forcojnë praninë e tyre në veri të Kosovës, veçanërisht në veri të Mitrovicës.
“…Jemi të bindur se kjo është bërë qëllimisht për të arsyetuar prezencën e shtuar të forcave speciale të armatosura dhe automjeteve të blinduara që mbrëmë ishin në rrugët e Kosovska Mitrovicës pas këtij incidenti dhe frikësuan qytetarët tanë. Hedhja e petardave apo piroteknika të ngjashme nuk është krim në vete, por ajo që na shqetëson është se falsifikimi i incidenteve të tilla synon të krijojë alibi për prezencën e forcave speciale të Kurtit në mjediset serbe, dhe represionin e vazhdueshëm të popullit tonë, si dhe arrestimet pa bazë.
Prandaj e përsërisim kërkesën ndaj KFOR-it dhe Eulex-it për forcimin e prezencës së tyre në veri të Kosovës dhe Metohisë, sidomos në Kosovska Mitrovica me qëllim parandalimin e këtyre incidenteve të fabrikuara, të cilat përsërisim regjimi i Kurtit me mjeshtëri i përdor si alibi për të justifikuar prezencën e njësive parapolicore, ngacmimi i popullit serb dhe arrestimi i serbëve”, shkroi Lista Serbe në Facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
