.png)
Gazeta Si – Një shpërthim i fuqishëm është regjistruar në orët e para të mëngjesit të kësaj të premteje në murin rrethues të banesës së deputetit të Partisë Demokratike, Xhelal Mziu.
Ngjarja ka ndodhur rreth orës 00:55 në zonën e Institutit në Kamzë, teksa dyshohet se në një sasi lënde plasëse ishte vendosur në murin rrethues të banesës së deputetit demokrat. Si pasojë e shpërthimit janë shkaktuar vetëm dëme materiale, teksa nuk ka të lënduar.
Sipas burimeve, banesa e Mziut nuk ka pasur kamerat aktive, pasi ishin shkëputur për shkak të një defekti dhe nuk kanë filmuar gjë.
Kanë qenë kamerat e fqinjve të deputetit, ato që kanë regjistruar zhurmën e fuqishme të shpërthimit, të cilat mund të ndihmojnë hetuesit në zbulimin e identitetit të autorit/ëve.
Grupi hetimor po punon për identifikimin dhe kapjen e autorit, si dhe për sqarimin e plotë të rrethanave të ngjarjes, ndërkohë që janë mbledhur dhe filmimet e disa kamerave në vendngjarje.
Mziu ka marrë mandatin e deputetit të PD për të dytin mandat radhazi nga zgjedhjet e 11 Majit 2025, pasi ishte pjesë e listës së sigurt në qarkun Dibër, ndërsa më herët ka mbajtur postin e kryebashkiakut të Kamzës.
Nuk dihet ende nëse bëhet fjalë për një konflikt personal të tij, apo diçka që lidhet me detyrat që ka mbajtur.
“Rreth orës 00:55, dyshohet se në rrugën “Arjan Sala”, në murin rrethues të banesës së shtetasit Xh. M., është vendosur një sasi e dyshuar lënde plasëse. Si pasojë e shpërthimit janë shkaktuar vetëm dëme materiale. Grupi hetimor po punon për identifikimin dhe kapjen e autorit, si dhe për sqarimin e plotë të rrethanave të ngjarjes”, – njofton policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
