Gazeta Si – Vetëm 10 minuta zgjati derbi sot mes Shkupit dhe Shkëndijës së Tetovës, dy skuadrave shqiptare në Maqedoninë e Veriut. Shkak u bë dhuna e paprecedentë në stadiumin e Shkupit, ku tifozët pushtuan fushën.
Ndeshja e vlefshme për çerekfinalen e kupës u ndërpre në momentin që tetovarët kaluan në epërsi. Ultrasit e Shkupit, “Shvercerat”, reaguan në mënyrën më të shëmtuar, duke shkaktuar dhunë.
Pasi hodhën flakadanë në fushë, duke dëmtuar lojtarët e Shkëndijës, teksa këta të fundit festonin golin, tifozët e Shkupit u futën edhe në fushë për t’i sulmuar fizikisht kundërshtarët.
Ndërhynë menjëherë forcat speciale, ndërsa ndeshja u ndërpre, sepse në kushte të tilla nuk mund të luhej. Tani vendimet u takojnë sektorëve përkatës në federatën e Maqedonisë së Veriut, por kjo ngjarje e prish shumë imazhin e dy skuadrave shqiptare.
Tifozët e Shkupit dhe ata të Shkëndijës së Tetovës nuk kanë pasur raporte të mira prej kohësh, por nuk pritej që situata të degjeneronte në një dhunë të tillë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
