Një 23-vjeçare në fshatin Bratosh të Malësisë së Madhe, është arrestuar nga policia gjatë një aksioni anti-drogë pasi në banesën e saj u sekuestrua një sasi lënde narkotike.
E arrestuara është E.M., ndërsa në kërkim janë shpallur edhe familjarët e saj; M.Th. 59 vjeç; D.Th. 51 vjeç; E.Th. 24 vjeç; D.Th. 20 vjeç.
Gjatë kontrollit në banesë u gjetën dhe sekuestruan 10 kg kanabis dhe një armë zjarri tip pistoletë, ndërsa në një territor të pyllëzuar pranë banesës së 23-vjeçares janë konstatuar të kultivuara bimë kanabis.
Bashkë me vajzën është arrestuar edhe një 15-vjeçar me iniciale F.P., ndërsa në kërkim është shpallur babai i tij, M.P. 48 vjeç.
Gjatë kontrollit në banesën e 15-vjeçarit, policia gjeti dhe sekuestroi 200 gramë kanabis. Nga veprimet e para hetimore rezultoi se 15-vjeçari ishte bashkëpunëtor i shtetasve të shpallur në kërkim për shpërndarje të lëndëve narkotike.
Ndërkohë, në Himarë, dy persona kanë rënë në pranga, pasi janë kapur duke shpërndarë lëndë narkotike kokainë dhe kanabis. Bëhet fjalë për 29-vjeçarin Ingrid Jaçe, banues në Tiranë dhe 23-vjeçarin Dino Xhelili banues në Orikum.
Arrestimi i tyre u bë pasi, dy të rinjtë në bashkëpunim me njëri-tjetrin, u konstatuan duke i shitur lëndë narkotike, 20-vjeçarit Enio Hajdini, i cili do të hetohet në gjendje të lirë.
Gjatë kontrollit të ushtruar ndaj dy të arrestuarve, janë gjetur dhe sekuestruar në cilësinë e provës materiale doza me lëndë narkotike kokainë dhe kanabis, 1 aparat celular dhe një shumë parash të dyshuara të përfituara nga kjo veprimtari kriminale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
