.png)
Nga Gazeta 'Si'- Agjencia e Mbikëqyrjes Policore, me urdhër të Prokurorisë së Gjirokastrës ka vënë në pranga Shefin e Sektorit të Krimit të Organizuar Alfred Kondi.
Sipas AMP, gjatë operacionit është arrestuar dhe një tjetër punonjës policie, një doganier, 2 shtetas të tjerë, teksa një efektiv është shpallur në kërkim.
Kryekomisari Kondi së bashku me nënkomisarin Xhevit Dine dhe efektivin e shpallur në kërkim Feim Onjea akuzohen për shpërdorim detyre dhe “shpërdorim i autoritetit policor”, vepra këto të kryera në bashkëpunim.
Ndërsa doganieri Bledar Mustafaraj dyshohet për “Falsifikim i dokumentave” dhe “Kontrabanda nga punonjës që lidhen me veprimtarinë doganore”.
Të arrestuarit e tjerë janë Ilir Muho dhe Kleodor Kazo, të cilët akuzohen për kontrabandë dhe falsifikim të vulave.
"Nga hetimet u dokumentua me prova ligjore përfshirja e shtetasve në veprën penale të trafikimit të emigrantëve të paligjshëm, favorizimin e shtetasve të ndryshëm në kontrabandimin e mallrave dhe organizimin e lojërave të fatit.
Gjithashtu u provua se punonjësit e policisë duke shfrytëzuar funksionin në periudha të ndryshme kanë ndikuar në lejimin e ushtrimit të aktiviteteve të paligjshme nga shtetas të ndryshëm. Në cilësinë e provës materiale u sekuestrua një automjet tip ML dhe katër aparate celularë", thuhet në njoftimin e AMP.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
