Është hedhur këtë të hënë në Nion të Zvicrës shorti për fazën e 1/32 të Europa League. 24 ekipeve të kualifikuara nga grupet e Ligës së Europës i janë bashkuar edhe 8 ekipe nga Champions League, duke formuar 16 çiftet që do të luajnë në këtë fazë.
Nga goglat e tërhequra në Nion janë evituar përplasjet e ekipeve të mëdha. E vetmja përballje e fortë është ajo mes Arsenalit dhe Benfica. Sakaq ekipet e tjera të mëdha në letër do të kenë përballje lehtë të kalueshme. Tottenham do të përballet me gjermanët e Wolfsberg, ndërsa Manchester United do të luaj kundër spanjollëve të Real Sociedad. I mirë ka qenë ky short për italianët e Champions, Milan, Roma dhe Napoli.
Kuqezinjtë do të përballen me Crvena Zvezda, Roma do të përballet me Braga, ndërsa Napoli do luaj kundër Granada. Dy përballje interesante në këtë fazë do të jenë edhe ato mes RB Salzburg-Villareal dhe Lille-Ajax.
Wolfsberg-Tottenham
Dynamo Kiyv-Club Brugge
Real Sociedad-Manchester United
Benfica-Arsenal
Crvena Zvezda-Milan
Antwerp-Rangers
Slavia Praha-Leicester City
RB Salzburg-Villareal
Braga-Roma
Krasnodar-Dinamo Zagreb
Young Boys-Bayer Leverkusen
Molde-Hoffenheim
Granada-Napoli
Maccabi Tel Aviv-Shakhtar Donetsk
Lille-Ajax
Olympiacos-PSV
Si zakonisht ka rregulla në short dhe është e paracaktuar që në fazën e 1/32-ve të mos përballen ekipe që kanë qenë në të njëjtin grup, si dhe skuadra të të njëjtit shtet. Komiteti Ekzekutiv i UEFA-s gjithashtu ka përjashtuar edhe përballjet e ekipeve ruse me ato ukrainase, për shkak të problemeve që këto shtete kanë mes tyre.
Takimet e para do të zhvillohen më 18 shkurt, ndërsa të kthimit më 25 shkurt. Skuadrat favorite (vazo 1), do t’i luajnë ndeshjet e para në transfertë, kurse në kthim në shtëpi. Oraret e përballjeve janë të njëjta, 18:55 dhe 21:00. Shorti për fazën e radhës do të hidhet më 26 shkurt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
