Gazeta Si – Tre inspektorë mbikëqyrës në Portin e Durrësit dhe një ndihmës-specialist kontrollor në Policinë Kufitare të këtij porti, janë arrestuar për shpërdorim detyre, pasi falsifikonin të dhënat për makinat dhe kontejnerët, duke bërë kontrabandë mallrash.
Policia tha se në pranga kanë rënë E.Gj. 35 vjeç, A.K. 52 vjeçe dhe D.M., 41 vjeç, të tre me detyrë inspektorë mbikëqyrës në kompaninë private që merret me përpunimin e mallrave dhe të kontejnerëve në Portin e Durrësit, si dhe ndihmës-specialisti kontrollor A.V. 27 vjeç.
Sipas Policisë së Durrësit, këta persona kanë regjistruar të dhëna të rreme në sistemet kompjuterike, me qëllim lejimin e kalimit pa kontroll doganor, të automjeteve dhe kontenierëve që transportonin mallra të kontrabanduara.
Ndërkohë, është shpallur në kërkim 56-vjeçari D.H., i akuzuar për veprat penale “Falsifikimi i vulave, i stampave ose i formularëve” dhe “Kondrabanda me mallra të tjera”, pasi dyshohet se ka falsifikuar vulat e sigurisë (plumbçet) të kontenierit të kamionit që drejtonte dhe me të ka kaluar mallra të kontrabanduara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
