Gazeta Si – Gjithsej 31 persona janë vënë nën hetim si pjesë e një hetimi anti-drogë të koduar “Tentakulat”.
Policia e Tiranës tha se 15 persona u arrestuan dhe dy të tjerë u shpallën në kërkim, pasi shisnin lëndë narkotike në klubet e natës.
Të ndaluarit e kishin fshehur lëndën narkotike nëpër vendet e dritave në tavan, në mes të pakove me sheqer, poshtë vazove të shtëpisë apo edhe në ambalazhet e çokollatave.
Të arrestuarit janë: E.H., 24 vjeç, E.H., 23 vjeç, R.M., 41 vjeç, A.M., 25 vjeç, L.H., 31 vjeç, S.M., 25 vjeç, E.K., 30 vjeç, H.K., 25 vjeç, I.E., 26 vjeç, R.K., 61 vjeç, D.Z., 22 vjeç, K.P., 25 vjeç, A.S., 45 vjeç, K.B., 23 vjeçe dhe B.K., 37 vjeç.
Nga ky operacion, u sekuestruan 745 gr kokainë e ndarë në doza, 110 gr heroinë, 1.3 kg kanabis, shuma parash, eurosh dhe dollarësh.
U sekuestruan gjithashtu 5 peshore elektronike, 25 telefona, 6 automjete, 1 motomjet dhe 1 biçikletë, që përdoreshin për shpërndarjen e lëndëve narkotike.
Gjithashtu, disa prej këtyre shtetasve, siguronin lëndën narkotike kanabis dhe tentonin ta shisnin edhe në afërsi të disa shkollave në qytetin e Tiranës.
Nga këta, 15 persona janë ndaluar me urdhër të prokurorit, 2 janë në kërkim dhe 14 të tjerë janë proceduar penalisht në gjendje të lirë.
Drejtori i Policisë së Tiranës, Lorenc Panganika, gjatë një konference për shtyp, u shpreh se droga shpërndahej në zona të ndryshme të Tiranës, kryesisht në lokale nate.
“Këta shtetas pasi siguronin lëndë narkotike të forta i tregtonin në zona të ndryshme të Tiranës, kryesisht në lokale nate ndërsa knanabisin e shisnin edhe pranë gjimnazeve”, – deklaroi Panganika.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
