.png)
Çfarë tjetër, Bunga Bunga Airlines? Një propozim i qeverisë italiane për të riemërtuar aeroportin kryesor të Milanos me emrin e ish-kryeministrit Silvio Berlusconi ka nxitur një protestë në Itali.
Një peticion i nisur nga grupi i krahut të majtë ‘Demokratët e Rinj’ të Lombardisë, që kërkon nga autoritetet që të rishqyrtojnë, arriti të hënën më shumë se 16,000 nënshkrime, ndërsa figurat e opozitës denoncuan nismën e qeverisë.
Berlusconi, një ish-udhëheqës i diskutueshëm dhe shumëngjyrësh i Italisë, i cili vdiq vitin e kaluar, po tregohet i aftë të mundojë armiqtë e tij edhe nga varri.
Stuhia filloi të premten pasi Ministri i Transportit Matteo Salvini njoftoi gjatë një konference në jug të Italisë se autoriteti kombëtar i aviacionit civil ENAC kishte miratuar një kërkesë nga rajoni i Lombardisë për të riemërtuar Aeroportin Malpensa për nder të Berlusconit.
“Vendimi përfundimtar i takon Ministrit të Infrastrukturës dhe Transportit dhe unë jam gati të vendos firmën e fundit, me krenari dhe emocion”, shkroi Salvini më vonë në X. “Në kujtim të mikut tim Silvio, një sipërmarrës i madh, një i madh Milanez dhe një italian i madh. Gjithmonë me ne”.
Njoftimi i Salvinit shkaktoi një reagim nga partitë dhe grupet e opozitës, të cilët janë kundër emërtimit të një prej qendrave më të rëndësishme ndërkombëtare të Italisë me një figurë kaq të diskutueshme. Berlusconi u dënua për mashtrim tatimor dhe u përfshi në shumë polemika ligjore dhe skandale seksuale gjatë viteve.
“Në Itali ne kemi kaluar nga emërtimi i aeroporteve sipas magjistratëve antimafia [1980-1990, Giovanni] Falcone dhe [Paolo] Borsellino tek Berlusconi, nga dikush që luftoi mafien në dikë që për vite e ka turpëruar Italinë në botë,” shkruan lideri i Lëvizjes 5 Yjet në Lombardi, Nicola Di Marco në një postim në Facebook. Ai argumentoi se emërtimi i aeroportit me emrin e Berlusconit është "një shenjë e prishjes totale të institucioneve italiane".
Peticioni i Demokratëve të Rinj, i nisur të dielën, argumenton se aeroporti meriton një emër "që mishëron vlerat e ndershmërisë, integritetit dhe shërbimit ndaj komunitetit", duke shtuar se "Berlusconi nuk pasqyron ato vlera, siç tregohet nga dënimet e shumta penale që ai ka marrë ndër vite.”
“Ne nuk duam që ai të mbetet vetëm një peticion, por edhe të tregojë historinë e një brezi që nuk dëshiron më të mbështesë glorifikimin e politikës dhe të një personi që ishte dënuar për mashtrim, ishte nën hetim për prostitucionin e fëmijëve dhe korrupsion”, tha Tiziana Elli, menaxhere e grupit.
Berlusconi, i cili vdiq në qershor të vitit të kaluar në moshën 86-vjeçare, udhëhoqi katër qeveri në krye të partisë së tij të qendrës së djathtë Forza Italia dhe ishte një nga figurat më përçarëse të Italisë në epokën moderne.
Kolegët dhe mbështetësit e tij të partisë e vlerësuan atë për aftësitë e tij sipërmarrëse, karizmën dhe kontributin e tij në peizazhin ekonomik dhe politik të Italisë, ndërsa kritikët e akuzojnë atë se përdori politikën për t'u pasuruar. politico.eu
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
