.png)
Është e vështirë të gjesh dikë që nuk ka ‘gabuar’ kurrë me kadaifin. Shumë njerëz kanë pohuar për Gazetasi.al se e kanë gatuar shpesh herë dhe gjithmonë kanë hasur me një problem dhe në fund të recetës, nuk ka dalë ai kadaifi i shijshëm dhe krokant.
Për të mësuar disa nga sekretet e një kadaifi perfekt, Gazetasi.al ka komunikuar me Shef Ilir Hysaj.
“Edhe mua që jam specializuar për recetat e ëmbla dhe kam shumë vite që e gatuaj, ndonjëherë nuk më ka dalë ai kadaifi perfekt dhe kjo është normale pasi është një recetë delikate që ka disa sekrete të vogla”, thotë Shef Iliri.
Në fillim është brumi për të bërë fijet e kadaifit, për të gjithë ato që duan ti bëjnë vetë.
Ai gatuhet njësoj siç mund të gatuajmë brumin për të bërë bukë apo krepa por duhet të jetë më i hollë dhe i njëtrajtshëm. Pastaj në një tavë që është në një temperaturë shumë të ulët, hidhet brumi me anë të një pajisje që do të mundësojë hedhjen e tij në fije të holla dhe pasi të hidhet në tavë, për pak sekonda mblidhen fijet e holla të krijuara nga brumi.
Shef Iliri tregon se kadaifin e kanë gatuar gjithmonë në familjen e tij dhe tashmë është kthyer si një traditë e trashëguar brez pas brezi ku ndërsa atij ia gatuante gjyshja dhe mamaja e tij, sot është Shef Iliri që iu gatuan fëmijëve. E bukura e kadaifit është se edhe pse në dukje ka një recetë të thjeshtë, ai gatuhet në mënyra të ndryshme ku çdo person mund ti shtojë pak “produkt dëshire”.
Veçantia e kadaifit ndryshon nga gjalpi, “nuk duhet të jetë vetëm arra një produkt i mirë por edhe gjalpi i fshatit ndihmon shumë në krijim e aromës unike”.
Receta:
1 kg kadaif
Gjalpë i freskët
100 gram sheqer
300 g arra të grira
Bëhet përzierja e arrës me sheqerin që do të na duhet më vonë. Në fillim, “mirë është që kadaifi te hapet komplet në një tavolinë” duke qenë se kadaifi është i njomë, duhet të rrijë gjysmë ore sa të thahet pak.
Pasi është tharë, fijet e kadaifit mund të hapen ose si një shtresë në një tavë që fillimisht është lyer me pak gjalpë, ose të bëhen role.
Pasi e kemi hapur kadaifin në fije, hedhim në mes sheqerin me arra që e kemi përgatitur më parë. Sipas dëshirës mund të hidhni edhe pak kanellë të bluar dhe fillojmë dhe e bëjmë role.
Gjalpin që kemi shkrirë fillojmë dhe lagim me të gjithë kadaifin dhe më pas e fusim në furrë të parangrohur 180 gradë.
“E mira është që pasi është pjekur pak, të filloni që gradualisht ti ulni gradët në 160 në mënyrë që të bëjë atë pjekjen e mirë si nga jashtë ashtu edhe brenda”, shpjegon Shef Iliri.
Shefi shpjegon se për pjekjen e kadaifit nuk mund të vendoset një orë e caktuar. Pjekja mund të dallohet vetëm duke e parë me sy se kur është bërë në ngjyrë floriri komplet pjesa sipër.
E rëndësishme është që të mos lihet derisa të marrë ngjyrë shumë të errët. Për ata që kanë ‘frikë’ mos nuk i rrinë dot në kokë, mund ta mbështjellin me një letër kuzhine. “Gjithsesi, afërsisht duhet një orë për t’u pjekur”.
Ndërkohë që presim që të piqet kadaifi, ju mund të bëni sherbetin. Sherbeti bëhet me një kg sheqer, 750 ml ujë në një tenxhere jo shumë të vogël. Brenda hidhni sipas dëshirës ose një shkop kanellë, ose katër fara karafili dhe gjysmën e lëkurës së një limoni dhe lihet 10 minuta derisa të marrë valë. Një mënyrë për të kuptuar se është bërë sherbeti është kur fillon të bëhen bulzat e mëdha që krijohen sipër. Sapo krijohen ato, atëherë duhet hequr nga zjarri.
Një metodë e vjetër për të provuar nëse është bërë sherbeti është edhe prova e gishtit.
“Merret një pikë e vogël dhe hidhet në majën e thojit të gishtit. Nëse pika qëndron, atëherë është bërë, nëse fillon edhe rreshket, do të thotë se do edhe pak”, thotë Shef Iliri.
Pasi është pjekur tava me kadaif, e lëmë të ftohet ndërkohë që sherbeti duhet të jetë i ngrohtë. Një sekret që Shef Iliri tregon për ëmbëlsirat që bëhen me sherbet është fakti se njëri produkt duhet të jetë i ftohtë. Pra nëse bëni kek me sherbet, keku duhet të jetë i ftohtë dhe sherbeti i ngrohtë.
Mbulojmë masën me sherbetin e ngrohtë që duhet të jetë afërsisht 60 gradë dhe e mbulojmë menjëherë dhe duhet të rrijë i mbyllur për një orë derisa të fillojë e të ftohet.
“Unë them se sekreti është tek pjekja. Duhet të jetë gjithmonë një kadaif i pjekur mirë, i tharë mirë pasi tharja bën që mos të bëhet i butë pas sherbetit”.
Mirë është që të hahet të nesërmen. Shefi tregon se më parë mbulohej me një gazetë dhe hahej të nesërmen ose mundësisht edhe pas dy ditësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
