Gazeta Si – Presidenti i SHBA-ve, Donald Trump, ka ngritur një padi për shpifje kundër transmetuesit britanik BBC, duke kërkuar 10 miliardë dollarë dëmshpërblim, raporton CBS News.
Padia, e ngritur në Distriktin Jugor të Floridës, përfshin një akuzë për shpifje dhe një akuzë për shkelje të ligjit të praktikave tregtare të Floridës. Ekipi ligjor i Trump kërkon 5 miliardë dollarë dëmshpërblim për secilën akuzë.
Në një padi prej 33 faqesh, avokatët e Trump akuzuan BBC-në për publikimin e një portretizimi “të rremë, shpifës, mashtrues, përçmues, nxitës dhe keqdashës” të presidentit në një dokumentar të transmetuar në Mbretërinë e Bashkuar një javë para zgjedhjeve të vitit 2024.
Një pjesë e dokumentarit u përqendrua në fjalët dhe veprimet e Trump në ditët para kryengritjes në Kapitol më 6 janar 2021.
Padia gjithashtu pretendon se BBC “qëllimisht dhe dhe në mënyrë dashakeqe, kërkoi të mashtronte plotësisht audiencën e saj”, duke montuar së bashku dy klipe të të njëjtit fjalim që Trump mbajti para mbështetësve të tij në Uashington.
Me padinë kundër BBC, Trump po e çon betejën e tij kundër medias përtej kufijve amerikanë. Në Shtetet e Bashkuara, presidenti prej kohësh i ka shpallur luftë medias, e ka etiketuar vazhdimisht si armik të popullit dhe ka nisur një sërë padish kundër “New York Times”, CBS dhe “Wall Street Journal” të mikut të tij Rupert Murdoch, nga i cili ka kërkuar 1 miliard dollarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
