Gazeta Si – Presidenti i SHBA-ve, Donald Trump, ka pezulluar dërgesat e llojeve të caktuara të armëve dhe municioneve në Ukrainë për shkak të shqetësimeve se rezervat e Shteteve të Bashkuara do të jenë shumë të ulëta.
Nuk është e qartë se për sa armë bëhet fjalë, por vendimi do të ketë një ndikim negativ në aftësitë ushtarake të Ukrainës në një kohë kur Rusia po kryen sulme ajrore intensive.
Mes armëve të pezulluara, janë municione precize dhe sisteme të mbrojtjes ajrore, si raketat “Patriot”, të cilat supozohej të dorëzoheshin në Ukrainë gjatë vitit të ardhshëm.
Sipas gazetave amerikane, vendimi u mor me nxitjen e Elbridge Colby, një zyrtar i lartë në Ministrinë e Mbrojtjes, i cili gjithmonë ka mbështetur një qasje luftarake dhe agresive në sferën ushtarake për të mbrojtur interesat e SHBA-ve.
Sipas Colby-t, dërgesa e vazhdueshme e armëve në Ukrainë rrezikon të dobësojë Shtetet e Bashkuara dhe ta bëjë atë të duket më e prekshme në sytë e vendeve armiqësore, duke filluar nga Kina, e cila më pas mund të ndihet më e legjitimuar për të nisur veprime ushtarake, për shembull kundër Tajvanit.
Vendimi u paraqit nga Shtëpia e Bardhë si një çështje sigurie kombëtare dhe është në përputhje me atë që anëtarët e administratës që janë më skeptikët në lidhje me përfshirjen indirekte të Shteteve të Bashkuara në luftën në Ukrainë, siç është aëvendës-presidenti J.D. Vance, kanë propozuar prej kohësh.
Megjithatë, është kritikuar nga disa kongresmenë demokratë. Së bashku me Bashkimin Evropian, Shtetet e Bashkuara janë një nga furnizuesit kryesorë të armëve në Ukrainë: që nga fillimi i pushtimit rus, në shkurt 2022, ata kanë dërguar ndihmë ushtarake për mbi 100 miliardë dollarë.
Javën e kaluar, Trump u takua me presidentin ukrainas Volodymyr Zelensky në takimin e NATO-s në Hagë, në Holandë: me atë rast, ai tha se ishte i hapur për të dërguar më shumë sisteme mbrojtëse “Patriot” dhe në përgjithësi për të vazhduar furnizimet me armë, edhe pse pezullimi i dërgesave ishte tashmë në fazën e planifikimit.
Trump ka qenë gjithmonë më afër presidentit rus, Vladimir Putin sesa Zelenski, por në muajt e fundit ai e ka kritikuar shpesh Putinin dhe ka treguar shenja padurimi me obstruksionizmin e Rusisë në negociatat e armëpushimit, të cilat deri më tani kanë qenë të paqarta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
