Nga Gazeta ‘Si’-Presidenti i Shteteve të Bashkuara, Joe Biden, tha të dielën(14 janar) se Uashingtoni i ka dërguar një mesazh privat Teheranit për rebelët e lëvizjes jemenase të mbështetur nga Irani, Houthi, të cilët janë përgjegjës për sulmet kundër anijeve tregtare ndërkombëtare në Detin e Kuq.
“Ne ua dhamë atë [mesazhin] privatisht dhe jemi të bindur se jemi të përgatitur mirë”, tha Biden për gazetarët në Shtëpinë e Bardhë të dielën, një ditë pasi forcat amerikane dhe aleatët e tyre i bombarduan për herë të dytë bazat e Houthit në Jemen.
Hollësitë e mesazhit privat nuk u bënë të ditura.
Shtetet e Bashkuara dhe Irani nuk kanë marrëdhënie diplomatike formalisht. Çështjet mes tyre në përgjithësi janë shtjelluar përmes Ambasadës së Zvicrës në Teheran prej vitit 1979.
Rebelët Houthi – sulmet e të cilëve kundër anijeve të lidhura me Izraelin dhe anijeve të tjera tregtare në Detin e Kuq kanë nxitur reagim ushtarak nga SHBA-ja dhe aleatët e saj janë zotuar për hakmarrje “të fuqishme” pas sulmit të dytë të së shtunës.
Ky kërcënim i rrit shqetësimet se mund të ketë konfrontime të mëdha ushtarake që burojnë nga lufta e Izraelit kundër Hamasit, grupit të shpallur terrorist nga SHBA-ja dhe BE-ja, në Rripin e Gazës, i cili njëlloj sikur lëvizja Huthi gëzon mbështetjen e Iranit.
Rusia dhe Irani, mbështetësi kryesor të rebelëve huthi, i dënuan menjëherë sulmet duke thënë se ato do të sillnin konfrontime të mëtejshme në Lindjen e Mesme.
“Sulmi i ri do të jetë një përgjigje e fuqishme dhe efektive”, tha zëdhënësi i Huthit, Nasruldeen Amer të shtunën, sipas Al-Jazeera.
Ai tha se nga sulmi i dytë nuk kishte viktima, të lënduar apo dëme materiale.
Kërcënimi i tyre vjen pas ushtria amerikane e kreu sulmin e dytë brenda dy ditëve, këtë herë kundër një zone radarësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
