Kryeministri izraelit Benjamin Netanyahu njoftoi se Izraeli do të pushtojë Rafahun në Rripin jugor të Gazës, edhe nëse Hamasi bie dakord me propozimin e fundit izraelit për një armëpushim.
“Ideja se ne do të ndalojmë luftën përpara se të arrijmë të gjitha qëllimet e saj është jashtë diskutimit”, tha Netanyahu, në një takim me përfaqësuesit e familjeve të njerëzve të marrë peng nga grupi militant palestinez.
“Ne do të hyjmë në Rafah dhe do të eliminojmë batalionet e Hamasit atje – me ose pa marrëveshje, në mënyrë që të arrijmë fitoren totale”, shtoi ai.
Familjet i kërkuan Netanyahut që të “përballojë presionin ndërkombëtar” për të ndalur luftën në Gaza, thuhet në deklaratën e publikuar nga Zyra e Kryeministrit. Presidenti i SHBA Joe Biden ka thënë se një pushtim i Rafahut do të ishte “vijë e kuqe”, megjithëse Netanyahu u zotua se do ta sfidonte këtë.
Izraeli ka kryer sulme ajrore të rregullta në qytet që nga fillimi i luftës dhe ka kërcënuar se do të dërgojë trupa, duke e quajtur Rafahun bastionin e fundit të Hamasit. Gjatë natës të së hënës, sulmet ajrore izraelite vranë të paktën 22 persona, duke përfshirë gjashtë gra dhe pesë fëmijë, thanë zyrtarët shëndetësor palestinezë.
Presidentja e Komisionit Evropian Ursula von der Leyen tha të hënën gjatë një debati zgjedhor të bashkëorganizuar nga POLITICO se do të ishte “plotësisht e papranueshme” që Izraeli të sulmonte qytetin palestinez, por nuk pranoi ta quante atë një “vijë të kuqe” që do të rezultonte në sanksione të BE-së kundër Izraelit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
