.png)
Nga Gazeta ‘Si’- SHBA njoftoi se Kina do të përballet tani me një tarifë të re deri në 245% për shkak të masave të saj hakmarrëse, sipas një deklarate nga Shtëpia e Bardhë.
Urdhri i fundit administrativ i Shtëpisë së Bardhë, përfshinte edhe shpjegime për tarifat doganore reciproke të shpallura më 2 prill.
“Kina tani përballet me një tarifë prej 245% për importet në Shtetet e Bashkuara si rezultat i veprimeve të saj hakmarrëse.
Disa muaj më parë, Kina ndaloi eksportet në Shtetet e Bashkuara të galiumit, germaniumit, antimonit dhe materialeve të tjera kyçe të teknologjisë së lartë me aplikime të mundshme ushtarake. Vetëm këtë javë, Kina pezulloi eksportet e gjashtë metaleve të rënda të tokës së rralla, si dhe magneteve të tokës së rrallë, në mënyrë që të mbyste furnizimet e komponentëve qendrorë për prodhuesit e automjeteve, prodhuesit e hapësirës ajrore, kompanitë gjysmëpërçuese dhe kontraktorët ushtarakë në mbarë botën”, thuhet në deklaratë.
Trump kishte planifikuar që një sërë tarifash të larta për vendet në mbarë botën të hynin në fuqi. Por javën e kaluar ai njoftoi “ngrirjen” e tyre për 90 ditë për vendet e goditura nga tarifat doganore më të larta të SHBA, përveç Kinës.
Sipas Trump, ky vendim është një taktikë negociuese për të përmirësuar kushtet tregtare me vendet e tjera, duke synuar që të sigurojë një marrëveshje më të favorshme për SHBA-në.
Ai ka theksuar se tarifat doganore do të adresojnë padrejtësinë në sistemin global të tregtisë dhe do të kthejnë vendet e punës dhe fabrikat në SHBA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
