.png)
Gazeta Si- Pse tifozët italianë ishin gjithmonë në pakicë? Edhe në Leipzig ndaj Kroacisë, si në Dortmund ndaj Shqipërisë, flamujt “axurr” ishin dukshëm në minorancë në stadium dhe në sheshet e qytetit përpara ndeshjes. Shqiptarët ishin gati pesëdhjetë mijë në “Westfalenstadion” të Dortmundit, kroatët 25 mijë në stadiumin e Leipzig.
Ndërsa italianët, pasi është ezauruar kuota 20 për qind e kapacitetit të biletave që i takon çdo federate, humbën sfidën e kuponëve neutralë, të cilët përfundojnë në duart e kundërshtarit. Në fakt, tifozët “axurrë” ndaj Kroacisë ishin rreth dhjetë mijë, pak më shumë se në sfidën ndaj Shqipërisë.
Proporcioni me mbështetjen spanjolle ishte pak më i mirë, ai i një kombëtareje tjetër që nuk është mësuar me ndjekje masive.
Skocezët, anglezët, serbët, si dhe shqiptarët, pastaj holandezët dhe turqit (më të shumtët, pasqyrim i komunitetit më të madh të huaj në Gjermani), por edhe disi çuditërisht, portugezët: pothuajse të gjithë i kalojnë tifozët “Made in Italy” në aspektin sasior, por shpeshherë edhe si cilësi në mbështetje e brohorima, sa i takon organizimit dhe mënyrës se si bien në sy.
Emigrantët e shumtë italianë me fëmijët dhe nipërit e tyre nuk mjaftojnë për të ulur diferencën, siç ishte rasti tetëmbëdhjetë vjet më parë kur fituan Kupën e Botës. Italianët udhëtojnë më pak për kombëtaren, duke iu përkushtuar më shumë klubeve që mbështesin.
E nëse vendosin të shpërngulen, atëherë nuk i gjejnë dot më biletat: shqiptarët dhe kroatët, që presin – me pritshmëri të ndryshme – kombëtaren e tyre, i kanë “pluhurosur” menjëherë italianët, pavarësisht nëse jetojnë apo jo jashtë vendit.
Por ka dhe raste për t’u vlerësuar. Për ta, Kampionati Evropian është një ngjarje, në disa raste i papërsëritshëm: mijëra gjeorgjianë kanë udhëtuar nga Tblisi për turneun e parë të Gjeorgjisë në Europë.
Të tjerë, si çekë, polakë, austriakë, përfituan nga afërsia me qytetet gjermane. Tani që Italia u kualifikua, mbështetja e tifozëve do të jetë edhe më e rëndësishme dhe ekuilibri mund të ndryshojë. Sepse faktori i entuziazmit në fund është ai që bën diferencën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
