.png)
Nga Gazeta ‘Si’- Edhe sot Komisoni Hetimor për Shëndetësinë u zhvillua me përplasje të ashpra mes kryetares Albana Vokshi dhe nënkryetarit Plarent Ndreca.
Fillimisht opozita nuk u lejua nga Garda që të hynte në sallë dhe mbledhja kishte nisur pa deputetët e opozitës. Përplasjet nisën kur Vokshi hyri në sallë dhe i fiku tre herë mikrofonin Ndrecës duke mos e lejuar që të flasë.
Ajo kërkoi të ndalen punimet e Komisionit pasi deputetët demokratë, që janë anëtarë dhe për të cilët ka një vendim përjashtimi nga Sekretariati i Etikës pasi dogjën karriget e Kuvendit, u ndaluan nga Garda e Republikës që të hynin aty.
Pjesë nga debati:
Albana Vokshi: Kush je ti mo, nuk je kryetar këtu dhe nuk e drejton këtë komision, unë te dera dhe ti guxon të fillosh mbledhjen.
Plarent Ndreca: Një njeri normal nuk i bën këto. Mbylle atë mikrofon dhe të të vijë turp.
Albana Vokshi: Të të vijë turp ty dhe gjithë deputetëve që nisin mbledhjen, kur kolegët rrinë të dera.
Plarent Ndreca: Do ulesh të drejtosh mbledhjen apo të vijoj. Mos u sill si e fortë. Do sillesh si kryetare.
Albana Vokshi: Në vend se të mbroni kolegët...
Plarent Ndreca: Kolegët që hedhin molotv nuk i mbrojmë ne
Albana Vokshi: Do jesh i pari që do e hash! Ti do të jesh i dyti në radhë të shkosh aty ku ka shkuar Ilir Beqaj
Më pas u përsëritën skenat e ditës së djeshme, ku Vokshi u përplas verbalisht me Plarent Ndrecën, pasi në cilësinë e kryetares ajo kërkoi largimin nga salla të zyrtarit që do të merrej në pyetje për çështjen që është objekt hetimi i komisionit.
Vokshi i kërkoi dëshmitarit Gentian Opre të dalë nga salla. Pas refuzimit, ajo kërkoi ndihmën e Gardës, por megjithatë Garda nuk ndërhyri.
Pasi Deputeti i PS, Ardian Ndreca u shpreh se “nuk punoj me njerëz që sillen si rrugaçe”, Vokshi i hodhi në dysheme mikrofonin.
Debati:
Albana Vokshi: Kujt i thua rrugaç ti?
Plarent Ndreca: Nuk thashë rrugaç, thashë njerëz që sillen si rrugaçë.
Ilir Metaj: Sekretaria njofton një ambulancë, situata është emergjente
Plarent Ndreca: Na lini të bëjmë mbledhjen
Ilir Metaj: Je deformuar frikshëm për të qenë grua, mbushu me frymë
Albana Vokshi: Ki kujdes me ato që thua
Ilir Metaj: Ke nevojë për trajtim të thelluar, dështimi i protestës të ka marrë jashtëzakonisht keq.
Albana Vokshi: Vetëm mesazhin e parë keni marrë nga protesta
Ilir Metaj: Qetësohu se je grua
Albana Vokshi: Sa me preke ti me këto, ty të njeh e gjithë Vlora!
Mbledhja përfundoi pas tre orësh.
Kryetarja Albana Vokshi dhe deputeti Petrit Vasili u larguan nga mbledhja duke thënë se është e paligjshme që Ndreca të merrte në pyetjet dëshmitarët. Ndreca thërriti dëshmitaren tjetër Mimoza Dhembi por kjo e fundit nuk ishte ende e pranishme. Teksa Vokshi u largua nga mbledhja, Ndreca hodhi në votim ndërprerjen e mbledhjes.
Vetëm me votat e PS dhe pa opozitën në sallë, mbledhja e ndërpre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
