.png)
“Perspektiva e rritjes ekonomike mbetet pozitive pavarësisht inflacionit të lartë”, tha Guvernatori i Bankës së Shqipërisë, Gent Sejko në një takim me përfaqësuesit e Fondit Monetar Ndërkombëtar.
“Në mbështetje të ekonomisë shqiptare, Banka e Shqipërisë ka filluar procesin e normalizimit të politikës monetare për të kontrolluar presionet inflacioniste dhe kthimin e inflacionit në objektiv në një horizont afatmesëm.
Banka e Shqipërisë me politikat e saj ka siguruar tregje të qeta financiare, një sistem të shëndetshëm bankar dhe rezerva të mjaftueshme valutore. Të gjitha këto së bashku me hapësirat për reagim të politikave monetare e fiskale, janë një garanci më shumë për përballimin e situatave kritike”, tha ai.
Temat e diskutuara ishin: ecuria aktuale dhe perspektiva e inflacionit dhe aktivitetit ekonomik, zhvillimet e sektorit bankar dhe financiar dhe gjithashtu edhe disa nga prioritetet e reformave strukturore.
Përfaqësuesit e FMN-së vlerësuan se qëndrimi i politikës monetare ka qenë dhe mbetet i përshtatshëm. Ata shtuan se situata ndërkombëtare mbetet ende e paqartë duke shtuar elementet e pasigurisë dhe nevojën për monitorimin me kujdes të dinamikës së zhvillimeve mbi inflacionin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
