.png)
Nga Gazeta ‘Si’ – Opozita në Kosovë i bëri të qartë kufijtë e saj.
Pas LDK-së dhe AAK-së të cilat që në krye të herës kanë qenë më të prera se nuk do të bënin një koalicion me Albin Kurtin, VetëVendosjes ‘ia mbylli derën’ edhe Partia Demokratike e Kosovës.
Kandidati i saj për kryeministër, Bedri Hamza, deklaroi se opozita ka marrë besimin për të formuar qeverinë e re dhe tha se LVV-ja është në kërkim të “pushtetit absolut”
Ndërsa LVV-ja është në pritje të numërimit të votave të diasporës, e ardhmja politike e Kosovës mbetet e paqartë për momentin.
Ndonëse Vetëvendosja prin zgjedhjet me 40.83% të votave, Kurti nuk arriti të sigurojë numrin e mjaftueshëm të deputetëve që i nevojiten për të krijuar qeverinë.
Në bazë të rezultateve të tanishme, në parlamentin e ri, Vetëvendosja e Kurtit do të ketë 46 deputetë, 12 më pak nga legjislatura e shkuar ku kishte 58 ligjvënës.
PDK-ja del nga këto zgjedhje me 25 deputetë, ndërsa LDK-ja me 20. Koalicioni AAK-NISMA për momentin kanë 9 deputetë.
Nëse llogaritë ngelin në të njëjtat kuota edhe pas votave të diasporës, rezulton se opozita ka më shumë deputetë, 54 të tillë përkundër 46 që ka Kurti.
Për momentin, Kurti i ka varur shpresat tek vota e diasporës ku bseson se mund të marrë 2 deri në 4 mandate.
Në skenarin më të mirë të mundshëm, Vetëvendosja mund të marrë 51 deputetë pas numërimit të këtyre votave, gjë që do t’i mundësonte Kurtit formimin e qeverisë me anë të deputetëve të minoriteteve joserbe, përveç Listës Serbe (partia më e madhe e serbëve në Kosovë).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
